Павлодарда инелікке ескерткіш қойылды

23.11.2022, 06:51 almaty-akshamy.kz

Темірден соғылып, тұғыры бетоннан құйылған инелікті гүлзардың үстіне қондыру жоспарланып отыр. Ал тапсырысты саябақты абаттандырып жатқан мердігер фирма берген, деп хабарлайды Аlmaty-akshamy.kz "Хабар 24"-ке сілтеме жасап. Жалпы, бұл жәндікке деген павлодарлықтардың құрметі бөлек. Тіпті инелікті қаланың символына айналдыру керек деген бастама да көтеріп жүр. Өйткені жаз шыға Ертіс өңірінің халқы қансорғыш жәндіктерден зардап шегеді. Маса-шіркейлерді жоюға бюджеттен қыруар қаржы да бөлінеді. Бірақ атқарылған жұмыс тиімділігін көрсете бермейді. Тек инелік шыққанда ғана зиянкестердің көзі жоғалады. Мәселен, бір инелік екі сағатта 40 шақты шыбын-шіркейді жояды екен. "Мынау инелік темірден жасалған. Темірден жасау қиын, оңай емес. Сондықтан бұл декоративті скульптура. Қанаты да мынадай шынымен қапталған. Қасымдағы жігіт екеуіміз төрт жылдан бері бірге істейміз, осы қалада, басқа жақтарда мүсін жасаймыз", - дейді мүсінші Марат Әбілқасымов.