Түркиядан Астанаға 16 қазақстандық және екі қырғыз азаматы арнайы ұшақпен оралды

08.02.2023, 06:32 azattyq.org

7 ақпанда кешке Түркиядан Қазақстан азаматтары арнайы ұшақпен Астана әуежайына жеткізілді, деп хабарлады "Қазақпарат" агенттігі.Ұшақ бортында 16 қазақстандық және екі қырғыз азаматы болған. Қырғызстанның этномәдени бірлестігі қырғыз азаматтарын қарсы алған.Сейсенбі күні Қазақстан сыртқы істер министрлігі 7 ақпанда жер сілкінісінен зардап шеккендер мен қаза болғандар арасында қазақстандық жоғын мәлімдеген. Алайда балалары Түркияда оқитын бірнеше ата-ана балаларын іздеп, министрліктен көмек сұраған.Бұған қоса, Түркияның Хатай қаласында Мирус Құрмашев есімді қазақстандықтың жоғалып кеткені белгілі болды. Жер сілкінісінен кейін онымен байланыс үзілген. Қазақстандықтар оны іздеу үшін Түркияға аттанған. Бұл жөнінде блогер Әлішер Елікбаев телеграм-арнасында жазды.Қазақстан сыртқы істер министрлігінің мәліметінше, Түркияда шамамен 75 мың қазақстандық бар болуы ықтимал. Түркия мемлекеттік статистика институтының мәліметінше, Түркияда иммигранттар негізінен Стамбул мен Анкара, Антальяда тұрып, жұмыс істейді.Ал Қырғызстан сыртқы істер министрлігі Түркияның Адана қаласында жер сілкінісінен бір қырғыз азаматы зардап шеккенін хабарлаған. Оған медициналық көмек көрсетілген. Ауруханадан шыққан.7 ақпанда қазақстандық құтқарушылар мен дәрігерлер Алматыдан түріктің Газиантеп қаласына ұшып барған еді. Олар жер сілкінісінен зардап шеккендерге көмектеседі.8 ақпанда Қазақстан жойқын жер сілкінісі салдарынан зардап шеккен Түркияға шұғыл көмек ретінде 1 млн доллар бөлетіні белгілі болды. Бұған қоса, “Қазақстанның өкілетті органдары түрік тарапымен бірлесіп, зілзаланың зардабын жою үшін қосымша көмек көрсету мәселесін қарастырады” деп хабарлады сәрсенбі күні Ақорда.Түркияның оңтүстігі мен Сирияның солтүстігінде болған аса ірі екі зілзаладан кейінгі құтқару жұмыстары әлі жалғасып жатыр. BBC мәліметіне қарағанда, зілзаладан 7,2 мыңнан астам адам қаза болған. Түркияда құрбандар 5,4 мыңнан асты. Елде бір апта қаралы күн жарияланды.