Түрмедегі Бишімбаевқа тамақпен бірге есірткі тасымалдаған ба?

11.07.2024, 08:02 kaz.365info.kz

ҚР Ішкі істер министрлігі изоляторда жатқан Қуандық Бишімбаевқа тамақ арқылы есірткі тасымалданды деген ақпаратты жоққа шығарды. Әлеуметтік желіде 7 шілдеде елордадағы тергеу изоляторында жатқан тұтқынға белгісіз әйел марихуана қосылған голубцы апарғаны туралы ақпарат тарады. Кейіннен бұл Салтанат Нүкенованы өлтіргені үшін сотталған экс-министр Қуандық Бишімбаевқа арналған деген қауесет тарады. «№64 мекемеде голубцы тағамының арасына салып, тыйым салынған затты өткізу әрекетінің жолы кесілді. Алайда бұл деректің Бишімбаевқа еш қатысы жоқ», – деп хабарлады Ішкі істер министрлігі. Осы оқиғадан кейін елордалық тергеу изоляторында тергеуде отырғандар мен сотталғандарға тартылған ет қосылған тағам әкелуге тыйым салынғаны хабарланды. Алайда Ішкі істер министрлігі өнімге қатысты жаңа ережелер енгізілмегенін мәлімдеді. ІІМ хабарлауынша, жазда түрмеге тез бұзылатын азық-түлікті әкелуге тыйым салынады. Тергеу изоляторындағыларға туыстары мен жақындары сәлемдеме түрінде дайын азық-түлік әкелуге болады.