Айыппұл мөлшері 300 млрд теңгеден асып, рекорд орнатты

21.01.2025, 06:11 kaz.365info.kz

2024 жылғы әкімшілік айыппұлдардың жалпы көлемі алғаш рет 300 миллиард теңгеден асты. Әкімшілік құқықбұзушылықтар саны 40%-ға жуық өсіп, 10,9 миллионнан 15,1 миллионға дейін жетті. Қоғам белсендісі Дидар Смағұловтың айтуынша, бұл өсім 2016 жылдан бастап 8 жыл бойы жалғасып келеді, бірақ тек былтыр 4 149 480 хаттама толтырылып, көрсеткіш күрт өскен. Айыппұл салудың басты мақсаты – қайталанатын құқықбұзушылықтардың алдын алу және ескерту. Бірақ біздің айыппұл жинаушы сала тұрақты түрде бюджетті толықтырудың «үдемелі» көзіне айналып кеткендей, – дейді белсенді. «Меніңше, мемлекет азаматтарын қорқытқанша, ұрлықты тоқтатып, бюджет қаражатын маңызы жоқ нәрселерге емес, халықтың игілігіне жұмсағаны дұрыс. Егер бұл үрдіс жалғаса берсе, онда бір жылдан кейін айыппұлдар саны елдегі халық санынан асып кетеді: яғни әрбір нәресте туған сәттен бастап айыппұл төлейтін болады», – дейді Смағұлов. Сондықтан қоғамдық белсенді сәл кідіріс жасап, басқару тәсілдерін қайта қарап шығу керек екенін айтады. Өйткені мұндай қатаң шаралар еш жерде жоқ. «Мысалы, еркін деп те, демократиялы деп те онша саналмайтын Ресейде 143,8 миллион халық бар, 2023 жылы соттарда қаралған әкімшілік құқықбұзушылықтардың саны бар болғаны 6,14 миллион. Егер соттан тыс айыппұлдарды қосып есептесек, бұл бәрібір біздегі «көрсеткішке» жетпейді», – дейді ол.