Сенат Қазақстан мен Қытай арасындағы Транскаспий көлік бағытын дамыту келісімін ратификациялады

20.06.2024, 10:28 ktk.kz

Келісім 2023 жылғы 17 қазанда Бейжің қаласында жасалған.

Келісімнің мақсаты — Транскаспий халықаралық көлік бағыты бойынша мультимодальды тасымалдауды дамыту үшін автомобиль, теңіз және теміржол көлік түрлерінің басымдығын тиімді пайдалануға жәрдемдесу, сондай-ақ келісім тараптарының аумақтары арқылы жүктерді тасымалдау үшін қолайлы жағдайлар жасау.

Заңда көліктің реттеуші салаларындағы ведомстволар мен кәсіпорындар арасындағы ынтымақтастықты нығайту, көлік бағытының тұрақты және тиімді жұмыс істеуін қолдау үшін даму ортасын бірлесіп қалыптастыру, логистикалық және көлік операцияларын оңтайландыру, тасымалдау уақытын қысқарту, көрсетілетін қызметтердің сапасын арттыру көзделеді.

Келісім Транскаспий халықаралық көлік бағыты бойынша жүк тасымалдау көлемін ұлғайтуға және Қазақстан мен Қытай арасындағы сауда-экономикалық қатынастардың одан әрі дамуын жақсартуға мүмкіндік береді.

Сонымен қатар Сенат «Қазақстан Республикасының Үкіметі мен Қытай Халық Республикасының Үкіметі арасындағы Транскаспий халықаралық көлік бағытын, оның ішінде Қытай-Еуропа қатынасындағы контейнерлік пойыздар үшін дамыту жөніндегі келісімді ратификациялау туралы» заңды мақұлдады.

Келісім тараптардың Транскаспий халықаралық көлік бағытын дамыту саласындағы ынтымақтастыққа, көлік байланыстарын интеграциялауға, тасымалдардың тиімділігін арттыруға, сауда-экономикалық және өнеркәсіптік ынтымақтастыққа жәрдемдесуге, сондай-ақ Қытайдан Азияға және Азия арқылы одан әрі Еуропаға жүктерді тасымалдау үшін қолайлы жағдайлар жасауға бағытталған.

Заңда Транскаспий халықаралық көлік бағыты бойынша жүктерді тасымалдаудың жыл сайынғы әлеуетті көлемін болжау, жылжымалы құрамды қадағалау жөніндегі деректермен алмасу және тараптардың аумақтарында контейнерлік пойыздар үшін экспорттық-импорттық, транзиттік тасымалдарды ұлғайту жөніндегі ынтымақтастықты дамыту көзделеді.

Бізді Youtubе-та қараңыз!Бізді Facebook-та, Instagram-да, Telegram-да оқыңыз!