Қазақстанда баспана бағасы 15 пайызға қымбаттауы мүмкін

20.11.2024, 06:45 kaz.365info.kz

Елімізде баспана бағасы тағы қымбаттауы мүмкін. Сарапшыларың пайымдауынша, келесі жылы пәтер құны 10-нан 15 пайызға дейін көтеріледі. Себебі, бизнестің осы түрі, яғни құрылыс саласына 12 пайыздық қосылған құн салығы қайта енгізілмек. Ал құрылыс компаниялары сол салықты қалтадан шығармас үшін шаршы метр құнына қосады дейді мамандар. Су жаңа үйлердің құны шарықтаса, ескі пәтерлер де қымбаттайды деген сөз. «Қазір құрылыс компаниясы үй салып, орта есеппен 15 пайыз пайда табады. Егер 12 пайыздық салық енгізілетін болса, құрылыс компаниясы нөлге жұмыс істейді деген сөз. Сондықтан оларда екі-ақ бағыт бар: пайдасыз істейді немесе шаршы метр бағасын көтереді. Әрине, екінші нұсқаны таңдайтыны белгілі», – дейді Қазақстан құрылысшылар одағы Астана филиалының директоры Вячеслав Лазарев. Осылайша түбінде зардабын тартатын — қарапайым тұтынушы. Өйткені келесі жылы жаңа салынған үйлер аспандайтын болса, сәйкесінше, ескі үйлердің құны да қатарласып қымбаттайтынына риелторлар сенімді. «Өйткені, бірінші санаттағы тұрғын үй бағасы тым қымбат болады. Сәйкесінше, екінші санаттағы үйдің иесі екінші санатты сатып, бірінші санаттағы пәтер алғысы келеді ғой. Сәйкесінше, екінші санаттағы үй бағасы сол бірінші санаттағы үйдің бағасына қарай өзгереді. Бағасы өссе, сатып алу мүмкіндігі азаяды», – дейді риелтор Шахрух Асқаров. Бұл жалпы жылжымайтын мүлік нарығына тікелей әсер етеді. Тұрғын үй нарығының қандай өзгеріске ұшырайтынын уақыт көрсетеді. Бірақ дәл қазір пәтер бағасы айтарлықтай тұрақталып қалды дейді риелторлар. Алматыда 40 шаршы метр бір бөлмелі пәтердің құны шамамен 25-30 миллион теңгенің төңірегінде. Енді 12 пайыздық салық енгізілсе, дәл сол үйдің құны қаншаға шығатынын келесі жылы салыстырып көреміз.