Сенат төрағасы экожүйені дамытудағы проблеманы атады

11.03.2025, 12:23 ktk.kz

Бұл туралы экожүйелерді ұтымды пайдалану тақырыбындағы орнықты дамуы саласындағы міндеттердің іске асырылуын мониторингілеу жөніндегі Парламенттік комиссияның отырысында Сенат төрағасы Мәулен Әшімбаев мәлім етті.

- Парламенттік комиссияның бүгінгі отырысы биоәртүрлілікті сақтау және құрлықтың экожүйесін тиімді пайдалану мәселелеріне арналып отыр. Жалпы, қазіргі таңда қоршаған ортаны қорғау және экожүйені дамыту бүкіл әлем үшін өзекті мәселе екені белгілі. Елімізде де бұл бағытта атқарылуға тиіс көптеген маңызды міндеттер бар. Сондықтан Президентіміз Қасым-Жомарт Кемелұлы Тоқаев осы салаға үнемі баса мән беріп келеді. Бүгінде Мемлекет басшысының тапсырмасымен жүйелі жұмыстар іске асырылып жатыр. Соның аясында Сенат депутаттары орман шаруашылығы мен ерекше қорғалатын табиғи аумақтарды, топырақты қорғау саласын реттейтін заң жобаларына бастамашы болды. Сондай-ақ, тиісті мемлекеттік органдар Биоәртүрлілікті сақтау тұжырымдамасын әзірлеуде. Бүгінгі отырыста жауапты министрліктердің басшылары атқарылып жатқан іс-шаралар мен алдағы жұмыстар бойынша сөз сөйлейді. Осы бағыттарға қатысты сарапшылар мен халықаралық ұйымдардың өкілдері де өз ойларын ортаға салады деп ойлаймыз, - деді М. Әшімбаев.

Оның айтуынша, 2024 жылғы орнықты даму индексіне сәйкес, жердегі экожүйелерді сақтау біздің ел үшін ең проблемалы алты бағыттың бірі саналады. Осыған орай, бүгінгі отырыста ең алдымен орман ресурстарын басқаруға, жердің тозуына жол бермеу және сирек кездесетін жануарлардың санын көбейту мәселелеріне арналмақ.

- Қазақстанда аумақтың 5 пайызында ғана орман алқаптары бар. Жағдайды антропогендік әсер ушықтырды, яғни ормандарды кесу, орман өрттері, орман ресурстарын қалпына келтіру бойынша жеткіліксіз жұмыс кері әсер етеді. Тағы бір өзекті мәселе топырақтың тозуына байланысты. Елімізде аумақтың үштен бір бөлігі немесе 90 млн гектардан астам жер эрозияға ұшыраған. Бұл мәселе ауыл шаруашылығы үшін ең өткір мәселелердің бірі саналады, - деді Сенат төрағасы.

Мамандардың бағалауына қарағанда, бұған жел мен су эрозиясы, жүйесіз түрде мал бағу, егін шаруашылығы технологиясының сақталмауы, ауыл шаруашылығы жерлерінің пайдаланылуына бақылаудың жеткіліксіздігі себеп болды.

- Еліміздің алдында тұрған тағы бір маңызды міндет – сирек кездесетін жануарларды сақтау және олардың санын көбейту. Бұл ретте белгілі бір жетістіктер бар. Оған мысал ретінде елімізде қар барыстарының көбеюін келтіруге болады, - деді Мәулен Әшімбаев.

Бізді Youtubе-та қараңыз!Бізді Facebook-та, Instagram-да, Telegram-да оқыңыз!