Шымкентте кісі қолынан өлген Раушан Перманованың ісі қарала бастады

02.12.2022, 09:36 azattyq.org

Шымкентте қылмыстық істер жөніндегі мамандандырылған ауданаралық сотында 39 жастағы Раушан Перманованың қазасына байланысты қозғалған іс қарала бастады. Адам өлтіру бабымен (99-баптың 1-тармағы) қозғалған іс бойынша алғашқы сот отырысы 1 желтоқсанда өткен. Негізгі күдікті — марқұм әйел үш ай бірге тұрған азамат Ермек Қабылбаев.Күдікті Қабылбаевтың адвокаты процесті жабық өткізуді сұраған, бірақ судья Әбсаттар Шахидинов бұл өтінішті мақұлдамаған. Журналистер процеске қатыстырылғанымен, тараптар сөйлеп жатқанда фото не видеоға түсіре алмайды. Сотталушы мен қорғаушы өзін түсіруге қарсы болған.— Судья күдіктіден "кінәңізді мойындайсыз ба?" деп сұрады. Ол "мойындаймын" деді. "Қалай өлтірдің?" дегенде "Білмеймін" деп жауап берді. Прокурор айыптау актісін оқыды. Сот процесі жарты сағат қана болды. Келесі сот отырысы 9 желтоқсанда болады, — деді Азаттыққа марқұмның ағасы Ержан Қыстаубаев.Раушан Перманова 29 тамызда кісі қолынан қаза тапты. Қазақстан ішкі істер министрлігі марқұм әйел үш ай бейресми некеде тұрған 50 жастағы Ермек Қабылбаевтың полицияға өз еркімен берілгенін хабарлаған. Сот кезінде Қабылбаевтың әйелді төрт жерінен пышақтағаны айтылған. Туыстарының сөзінше, күдікті азамат Раушан Перманованың мойны мен аяғынан пышақтаған. Олар марқұмның мәйітінен көгерген іздер де көрген.Азаттық қазан аяғында Перманованың қазасы туралы жазды. Әйел кәмелет жасына толмаған екі қызымен ерте жесір қалып, тоғыз жылдан соң күдікті азаматпен танысқан. Көп өтпей екеуі мұсылманша неке қидырып, бірге тұра бастайды. Туыстарының сөзінше, күйеуі Раушанға психологиялық қысым көрсеткен. Туыстарымен араласуға тыйым салған, жұмысынан шығарып алып, телефонын, банк картасын тартып алған.Шілде басында Раушан төркініне келгенде туысына "Мені құтқарыңыздар" деп сыбырлап үлгереді. Осыдан соң туыстары әйелді үйіне әкелген. Екі айдан соң, 29 тамызда түске қарай қалаға шыққан Раушан қызына "жанында Ермек Қабылбаев барын" айтып, хат жібереді. Бұдан соң әйелдің телефоны сөніп, бірер сағаттан соң полиция әйелдің қаза болғанын хабарлайды.Туыстары Азаттыққа тергеу "күдіктінің жазасын жеңілдетуге тырысып жатыр" деп күдіктенгенін айтқан. Олардың сөзінше, тергеуші іс адам өлтіру емес, денсаулыққа қасақана зиян келтіру бабымен қозғалуы мүмкін екенін айтқан. Шымкент полиция департаменті мен тергеушінің өзі Азаттыққа мұны жоққа шығарып еді.Құқық қорғаушылар мен белсенділер Қазақстанда әйелдер құқығы жиі тапталатынын, тұрмыстық зорлық-зомбылық көрсеткіші бойынша ел әлем бойынша алдыңғы орындарда тұратынын айтады. Халықаралық Human Rights Watch адам құқығын қорғау ұйымы Қазақстан билігін тұрмыстық зорлық-зомбылық жасағандарды қылмыстық жауапкершілікке тартуға мүмкіндік беретін қадам жасауға үндеп келеді.Біріккен Ұлттар Ұйымының дерегінше, жыл сайын Қазақстанда шамамен 400 әйел тұрмыстық зорлық-зомбылық құрбаны болады.