Нью-Йорк соты жүк көлігімен жұртты қақты деп айыпталған Саиповті өмір бойы түрмеге кесті. Ол Өзбекстанда туған

15.03.2023, 06:42 azattyq.org

2017 жылы Нью-Йоркте велосипед жүретін жолда бір топ адамды жүк көлігімен қағып өтті деп айыпталған Сайфулло Саиповке өмірлік түрме жазасын берді. Сот оны мерзімінен ерте босап шығу құқығынан да айырды. Сотталған ер адам Өзбекстанда туған. Шабуылдың салдарынан сегіз адам қаза болып, 12 адам зардап шеккен.Бұған дейін прокурор оған өлім жазасын беруді сұраған, алайда сот алқасы бұл мәселе бойынша ортақ шешімге келе алмаған.26 қаңтарда АҚШ федералдық судьясы Сайфулло Саиповті кінәлі деп танып, сот үкімі наурызда оқылады деп айтқан еді.АҚШ-қа 2010 жылы қоныс аударған 34 жастағы Сайфулло Саипов 28 эпизод бойынша (арасында адам өлтіру, "Ислам мемлекеті" экстремистік тобына материалдық көмек беру де бар) кінәлі деп танылды. CNN хабарына қарағанда, соңғы сөзінде айыпталушының адвокаты Дэвид Пэттон "қорғау тарабында Саиповтің көшедегі адамдарды қағып өткеніне дау жоқ, алайда ол мұны жұртты ИМ-ге тарту үшін істеді деген прокуратура тұжырымына келіспейміз" деген.Бұған дейін Саипов істегеніне өкінбейтінін және "неғұрлым көбірек адамды" өлтіргісі келетінін айтқан. Саипов ұсталғаннан кейін шабуыл жасауға ИМ-нің бейнероликтері түрткі болғанын айтқан. ИМ-нің өзі шабуылды мойнына алған. Саиповтің адвокаттары соттан Нью-Йорк прокуратурасын сотталушыға өлім жазасын беруге ықпал ету мүмкіндігінен айыруды сұраған.АҚШ-тағы таныстары Саиповті қаржы мәселелері бар агрессияға бейім жас жігіт деп сипаттаған. Жақындарының айтуынша, ол Ташкентте туып-өскен. Өзбекстанда жүргенде қаржы мәселелері болмаған және дінге де жақын болмаған. Өзбекстан ақпарат құралдарының жазуынша, АҚШ-қа кеткенге дейін 2005-2009 жылдары Ташкенттегі жоғары оқу орнында оқыған. Оқудан соң жергілікті қонақүйлердің бірінде есепші болып жұмыс істеген. Өзбекстанда бұрын-соңды қылмыстық жауапқа тартылмаған.