Анасына көмектесемін деп 12 жастағы жасөспірім үш саусағынан айырылды

20.06.2024, 07:34 kaz.365info.kz

Алматы облысында қолы электронды еттартқышта қыстырылып қалған 12 жастағы жасөспірім Есік қаласындағы Еңбекшіқазақ көпсалалы орталық аудандық ауруханасына шұғыл түрде жатқызылды. Жасөспірім анасына етті еттартқыштан өткізуге көмектескен. Бірде электронды еттартқыш баланың қолын тартып әкеткен. Науқас ауруханаға қолы еттартқышқа кептелген күйі жеткізілді. «Бала ет тартып отырғанда қолында матадан тігілген қолғап болған. Сөйтіп электронды еттартқыш матаны орап әкеткенде, баланың саусақтары да бірге кеткен. Бала жедел жәрдем бөліміне жеткізіліп, хирургтар мен травматолог мамандар науқасты ота жасауға алып кетті. Ота кезінде баланың қолы еттартқыштан алынды», – деді Еңбекшіқазақ көпсалалы орталық аудандық ауруханасы директорының емдеу ісі жөніндегі орынбасары Диана Сүлейманова. Операцияға Есік қаласындағы орталық аудандық аурухананың хирург-травматолог дәрігерлер бригадасы жұмылдырылды. Дәрігерлер баланың қолы мен екі саусағын аман алып қалды. «Бес саусақтың екеуі – бас бармақ пен кішкентай саусақты аман алып қалдық. Өкінішке қарай, үш саусақты сақтап қала алмадық. Саусақтар еттартқыштың ішінде түгелдей жаншылып, жұлынып қалды. Бала шок алды. Бірақ есін біледі, сұрақтарға жауап беріп жатты. Шокты басып, саусақтарды кесіп тастадық», – дейді дәрігер.