Атырауда жол қозғалысын реттеп тұрған полицейді көлік қағып кетті

01.10.2024, 07:46 ktk.kz

Атырау облыстық полиция департаментінің баспасөз қызметінен мәлім еткендей, оқиға 30 қыркүйекте болған.

«Кешкі сағат 18:40 шамасында Toyota Corolla автокөлігінің жүргізушісі Атырау қаласындағы Қ.Сатпаев-Ерниязов көшелерінің қиылысында патрульдік полиция батальонының қызметкерін қағып құлатқан. Сол сәтте полиция қызметкері жол қозғалысын реттеп тұрған. Түрлі дене жарақатын алған полиция қызметкері облыстық ауруханаға жеткізілді», - деп хабарлады департаменттің баспасөз қызметі.

Қазір жол-көлік оқиғасына қатысты тиісті іс-құжаттар жинақталды. Сараптамалар қорытындысына сәйкес шешім қабылдау үшін сотқа жолданатын болады.

«Жол-көлік оқиғасына себепкер болған көлік жүргізушісі көзі күнге шағылысқандықтан, патрульдік полиция қызметкерін көрмей қалғанын айтады. Бірақ, бұл жауапкершіліктен құтқармайды», - деп мәлім етті департаменттің баспасөз қызметінен.

Дереккөз: Kazinform

Бізді Youtubе-та қараңыз!Бізді Facebook-та, Instagram-да, Telegram-да оқыңыз!