Қазақстан органикалық өнім экспортын арттырып келеді

20.05.2022, 11:32 almaty-akshamy.kz

Қазақстан өткен жылы органикалық ауыл шаруашылығы өнімдерінің экспортын $32 млн дейін арттырды. Жоғары сұранысты ескере отырып, сала мамандары өндіріс көлемін одан әрі арттыру үшін мемлекеттен қолдау күтеді, деп хабарлайды Almaty-akshamy.kz Eldala.kz сілтеме жасап. «Атамекен» палатасында ORGANIC жобалық кеңсесі аясында сала мамандарының қатысуымен алғашқы ашық отырыс өтті. "2021 жылы елден $32 млн органикалық өнім экспортталды, 2019 жылы экспорт $15 млн, 2020 жылы $10 млн құрады. Негізгі тауарлар-органикалық зығыр, бидай, соя, күнбағыс, жасымық болып табылады. Аз мөлшерде күнбағыс майы, арақ пен бал экспортталады", - деді ҰКП Агроөнеркәсіптік кешенді дамыту департаментінің директоры Ербол Есенев. Ол бүгінгі таңда органикалық шаруашылық 300 гектардан астам жерге жүргізілетінін атап өтті. Сарапшылар халықаралық сертификаттаудың жоғары құнын, мемлекеттік қолдаудың жеткіліксіздігін, органикалық дақылдарды өндіру және сату мәселелерінде білім мен тәжірибенің тапшылығын Қазақстанда органиканың дамуын тежейтін факторлар деп атайды. Жүйелік мәселелерді шешу үшін Ауыл шаруашылығы министрлігі, Qazaq Organic одағы, UNION Atameken және сала өкілдері жобалық кеңсенің 2022 жылға арналған жұмыс жоспарын бекітті. Атап айтқанда, органиканы дамытудың жол картасының жобасын әзірлеу, қытай бағытын қоса алғанда, жаңа нарықтарға шығу мүмкіндіктерін пысықтау жоспарлануда. Сондай-ақ, жобалық кеңсенің назарында: заңнамалық базаны жетілдіру, PGS-Қазақстан бірлескен кепілдіктер жүйесін құру, оқыту, ғылыми-технологиялық және білім беруді қолдау, қаржылық қолдау құралдарын қарау, органикалық өндірушілердің шығындарын субсидиялау мәселелерін шешу. БҰҰ Даму бағдарламасының өкілі Фируз Ибрагимовтың айтуынша, ұйым Қазақстандағы органикалық өнім өндірушілермен тығыз байланыста."Біз жобалық кеңсені қолдауға және өндірушілерімізбен және органикалық егіншілік бойынша серіктестерімізбен жұмыс істеуге дайынбыз", – деп сендірді ол. Өз кезегінде Qazaq Organic Union одағының директоры Арсен Керімбеков халықаралық бағдарламалардың жұмысын сынға алып, органиканы дамыту жөніндегі жұмыстың жаңа тәсіліне көшуді ұсынды. "Үкімет органикамен айналысатын кәсіпкерге субсидия бергісі келеді. Біз үкіметке есеп беруіміз керек. Субсидия алу үшін есеп беріп, қажеттілігін дәлелдеу қажет. Біз халықаралық бағдарламаларда қаражат сұрамаймыз, бізге сіздің тәжірибеңіз қажет. Біздің мамандарды оқыту жеткілікті. Осы бағытта бірге жұмыс істейік", - деп ұсынды Арсен Керімбеков. Кездесу соңында кәсіпкерлер мен сарапшылар кеңсе аясындағы бірлескен жұмыс туралы келісті. Жобалық кеңсенің келесі отырысында білім беру саласындағы органиканы дамыту талқыланады.