«Сөзбен айтып жеткізу мүмкін емес»: Руслан Берденов ел алдына шығып, мәлімдеме жасады

12.05.2025, 14:17 paryz.kz

Ол Instagram парақшасында жүрекжарды жазба жариялап, өзін қолдаған барша халыққа алғысын білдірді:

«Құрметті шымкенттіктер, қадірлі Қазақстан халқы! Менің басыма түскен ауыр жағдайдан көпшілігіңіз хабардарсыздар деп білемін. Бұл оқыс оқиға маған да, менің отбасым мен жақындарыма да ауыр тигені анық. Мұны сөзбен айтып жеткізу өте қиын.

Алайда, сынаққа толы болған осы уақыт аралығында көптеген адамдардың, әріптестерімнің, тамыр-таныстарымның жанашырлығын, қолдауын, тілектестігін сезіндім. Телефоныма түскен қоңыраулар, хабарламалар, әлеуметтік желідегі тілеулес жазбалар көңіліме демеу болғанын, күш-қуат бергенін, сергіткенін айтқым келеді.

Міне, 3 аптаға созылған ауруханадағы күндерім аяқталып, өзім де аяқтан тұрып, күнделікті тіршілігіме оралатын сәт таяп қалды.

Әлбетте, бірінші Алланың, содан соң дәрігерлеріміздің жіті бақылауының, ем-домының арқасында денсаулығым оңалды, қалпына келді.

Әсіресе, @kabylov_dauren @dr.ashirbaev_erlan @1.qalalyq.auruhana ұжымына. Осы уақыт ішінде мен еліміздің медицинасы көп ілгерілегеніне, шетелдік клиникалардан еш кем еместігіне көз жеткіздім.

Ақ халатты абзал жандарымыздың мейірімі мен кәсібилігі де ризашылығымызға әбден лайық. Баршаңыздың қолдауларыңыз бен жанашырлықтарыңызға шексіз алғысымды айтамын» – деп жазды ол инстаграм парақшасында.

Берденовке сәуір айында қастандық жасалған еді. Оған бірнеше рет оқ атылып, ауыр халде ауруханаға түскен болатын. Қазіргі таңда оның жағдайы жақсарып, сауығу кезеңінен өтіп жатыр.