Мәжіліс депутаты Темір Қырықбаев: «Ескі Як-40 ұшақтарын пайдалануды тоқтату қажет»

08.10.2025, 13:06 kaz.365info.kz

ҚР Парламенті Мәжілісінің депутаты Темір Базарбайұлы Қырықбаев ҚР Көлік министрі Нұрлан Ермекұлы Сауранбаевқа депутаттық сауал жолдады. Халық қалаулысы сауалында еліміз аумағында әлі күнге дейін 1981 жылы сериялық өндірісі тоқтатылған кеңестік Як-40 жолаушылар ұшақтарының пайдаланылып жүргеніне назар аударды.

Бүгінгі таңда әуе кемелері 44-55 жыл бұрын шыққандар, яғни әлемдік тәжірибедегі аймақтық авиация паркінің орташа шекті жасынан (15-20 жыл) екі есе ескі.Қырықбаевтың айтуынша, Як-40 ұшақтарының техникалық ресурсы әлдеқашан таусылған. Олар 1960 жылдары жасалған АИ-25 қозғалтқыштарымен жабдықталған, ал бұл қозғалтқыштардың өндірісі 1980 жылдардың соңында тоқтаған. 2022 жылдан бастап қозғалтқыштарды өндіруші «Мотор Сич» кәсіпорнының қызметі де тоқтап, жабдықтары бөлшектелген.

Алайда, депутат атап өткендей, Қазақстанда бұл ұшақтар әлі күнге дейін санитарлық авиацияда, яғни пациенттерді тасымалдау үшін қолданылып жүр. Бұл өз кезегінде адам өмірі мен денсаулығына тікелей қауіп төндіреді.

«Қазақстан Республикасының әуе кеңістігін пайдалану және авиация қызметі туралы» Заңының 4-бабына сәйкес негізгі мақсаттар – адамның өмірі мен денсаулығын, қоршаған ортаны, мемлекеттің мүдделерін қорғау және әуе кемелерінің ұшу қауіпсіздігін қамтамасыз ету болып табылады», – деді Қырықбаев.

Депутаттың пікірінше, халықаралық стандарттарға сай келмейтін әуе кемелерін пайдалануды жалғастыру Қазақстанның халықаралық беделіне нұқсан келтіреді, әрі әуе қауіпсіздігі қағидаттарына адал ел ретіндегі имиджін әлсіретеді.

Осыған байланысты Мәжіліс депутаты мынадай шараларды қарастыруды ұсынды:1. Адам өміріне қауіп төндіретін Як-40 ұшақтарын ел аумағында пайдалануды толық тоқтату;2. Осы жылдың соңына дейін Як-40 әуе кемелерін кезең-кезеңімен пайдаланудан шығару кестесін әзірлеу;3. ICAO халықаралық стандарттарына сай келетін заманауи әуе кемелеріне көшу бағдарламасын дайындап, бекіту;4. Қоршаған орта мен мемлекеттің мүдделеріне қауіп төндірмейтін қауіпсіз ұшақтармен қамтамасыз ету.

Толық оқыңыз…