Теннистен Майами турнирі: Дмитрий Попко іріктеу сайысының финалына шықты

22.03.2022, 05:09 inform.kz

НҰР-СҰЛТАН. ҚазАқпарат – Қазақстандық, әлемнің 175-ракеткасы Дмитрий Попко Майами мастерс турнирінде іріктеу сайысының финалына шықты, деп хабарлайды ҚазАқпарат тілшісі. Қазақстандық теннисші іріктеу сайыстарының жартылай финалында әлемнің 116-ракеткасы, бразилиялық Тьяго Монтейромен шеберлік байқасты. Д.Попко іріктеу сайыстарының 13-ракеткасы болып тіркелген қарсыласын 6:4, 4:6, 6:4 есебімен ұтты. Екі сағат жарымға жуық уақытқа созылған матч барысында ол 5 эйс жасап, 10 брейк-пойнттың тең жартысын өз есебіне жазды. Т.Монтейро 4 эйс, 4 брейкпен (8 брейк-пойнт) шектелді. Дмитрий Попко іріктеу сайыстарының финалында әлемнің 167-ракеткасы, америкалық Джеффри Джон Волфпен кездеседі. Тағы бір қазақстандық Михаил Кукушкиннің іріктеу сайыстарының финалындағы бәсекелесі – жапониялық Шинтаро Мочизуки. Д.Попко мен М.Кукушкин қарсыластарын ұтса, 23 наурыз – 3 сәуір аралығында өтетін негізгі турнирге жолдама алады. Майами мастерс турнирінде Қазақстанның бірінші, әлемнің 32-ракеткасы Александр Бублик те өнер көрсетеді. Еске сала кетейік, бұдан бұрын қазақстандық теннисшілердің әлемдік рейтингіде жоғары көтерілгенін жазған болатынбыз. Сондай-ақ Михаил Кукушкин Майами турнирінің іріктеу сайысын сәтті бастады.