Паралимпиада: Қазақстан волейболшылары жартылай финалдан тыс қалды

03.09.2024, 08:59 ktk.kz

Осыған дейін қазақстандықтар мен мысырлықтар өз тобында Францияны ұтып, Босния және Герцеговина құрамасына есе жіберген. Сондықтан қай жеңгені екінші орынмен жартылай финалға жолдама алатын еді.

Қазақстан құрамасының бас бапкері Бауыржан Тахауов команда капитаны, байланыстырушы Бауыржан Сартаев, Ерболат Алтаев, Ерлан Бимұратов, Ерік Қасқабаев, Пердебай Намұратов, Ерасыл Әбдібекке сенім артты. Арасында басқа ойыншылар да қосылып отырды.

Бірінші партияда қазақстандықтар 6:8 есебімен жеңіліп жатып, таразы басын теңестіріп қана қоймай, алға шықты – 11:8. Алайда мысырлықтар сет соңына таман күш алып кетті – 25:21.

Екіншісінде мысырлықтар алға кеткенімен (9:4), Тахауов шәкірттері есепті қысқартты – 7:9.

Сосын қарсылас команда тағы ұзап кетті. Дегенмен Пердебай Намұратов екі рет эйс жасап, Қазақстанды алға шығарды – 21:20. Бірақ сол мүмкіндікті пайдалана алмады – 23:25.

Үшінші сетті Мысыр құрамасы жақсы бастады – 6:2. Дегенмен қазақстандықтар алға шыға білді – 9:7. Сосын 14:8-ге жеткізді. Сол басымдылықтан айырылған жоқ – 25:16.

Төртінші партияда мысырлықтар қара үзіп кетті – 16:6. Ақыры олар дегеніне жетті – 25:18. Қорытынды есеп – 3:1, Мысырдың пайдасында.

Осылайша, Қазақстан пара волейболшылары жартылай финалға шыға алмай, жүлделі орындарға таласу мүмкіндігінен айырылды.

Бізді Youtubе-та қараңыз!Бізді Facebook-та, Instagram-да, Telegram-да оқыңыз!