Париж Олимпиадасында берілген жүзден астам медаль қайта ауыстырылады

18.01.2025, 09:06 kaz.365info.kz

2024 жылғы Олимпиада аяқталғанына жарты жылға жуықтаса да оған қатысты дау-дамай толастар емес. Бұл жолы француздық La Lettre журналы Париж Олимпиадасына қатысқан жүзден астам спортшы медалін қайтарғанын хабарлады. Себебі медальдардың бояуы кетіп, тот басқан сияқты өзге кейіпке ене бастаған. Сапасы сыр берген медальдарды Cojop Paris 2024 компаниясы жинап жатыр, олар осы компанияның тікелей қатысуымен жасалған болатын. Халықаралық Олимпиада комитеті барлық жүлдегерге медальды алдағы апталарда ауыстыруға уәде берді, бірақ нақты мерзімін айтпады. Медальдарды дайындаған Париж монета сарайы бұл жағдайға қатысты пікір білдіруден бас тартып, коммерциялық құпияны алға тартты. Алайда журналдағы мақаладан кейін монета сарайында үлкен дүрбелең туғызып, сапаға жауапты үш директор жұмыстан босатылды. Сарапшылардың пікірінше, негізгі кінә сапасыз лакта болуы мүмкін. Жоспар бойынша басқа лак қолданылуы керек болған. Алайда оның құрамындағы компоненттердің біріне тыйым салынғандықтан, өндіріс барысында басқасы қолданылған. Айта кетейік, Париж Олимпиадасында қазақстандық спортшылар жеті медаль жеңіп алды. Дзюдошы Елдос Сметов алтын иеленсе, гимнаст Нариман Құрбанов, грек-рим күресінің балуаны Демеу Жадыраев және боксшы Нұрбек Оралбай күміс алды. Ал қола жүлдеге дзюдошы Ғұсман Қырғызбаев, боксшы Назым Қызайбай және аралас командалық жарыста Ислам Сәтбаев пен Александра Ле қол жеткізді. Әзірге қазақстандық спортшылар медальдың сапасына шағымданған жоқ. Дегенмен, ХОК пен француз БАҚ-тары медальдарын қайтарған спортшылардың қай елден екенін жарияламады. ХОК бұл мәселені дабыра қылмай шешуді жоспарлап отырған сияқты, себебі бұл оқиға дау-дамайға толы Париж Олимпиадасының беделін одан әрі түсірмеуі үшін жасалып отыр.