Алматыда жоғары жылдамдықтағы интернетке қосу жұмыстары жалғасуда

30.06.2022, 07:31 almaty-akshamy.kz

Телекоммуникациялық инфрақұрылымды дамыту шеңберінде Алматыда жоғары жылдамдықтағы интернетке қосу жұмыстары жалғасып жатыр. Бұл туралы қала әкімі Ерболат Досаев Түрксіб ауданының тұрғындарымен кездесу барысында айтты, деп хабарлайды Almaty-akshamy.kz. «Биыл 342 үй талшықты-оптикалық байланыс желісіне қосылды, оның ішінде Қайрат шағын ауданында - 317 және Әлмерек шағын ауданында – 25 үй. 2022 жылдың соңына дейін 25 мыңға жуық халық тұратын Баум тоғайы, Нижняя Пятилетка шағын аудандарын қосу жоспарланған»,- деді қала әкімі. Ерболат Досаевтың айтуынша, жолдар мен адам көп жиналатын жерлерді бейнебақылау жүйесімен көптеп қамту арқылы қауіпсіздікті қамтамасыз етуге көп көңіл бөлінеді. «Биыл жолдардағы Сергек аппараттық-бағдарламалық кешендерінің саны 2 есе, яғни 82-ден 160-қа дейін көбейтіледі (желілік учаскелерде 141 аппаратық-бағдарламалық кешен, қиылыстарда 19).Қосымша 322 бейнебақылау камерасы орнатылады, оның 111-і жол қиылыстарына, 76-сы аулаларға, 18-і парктер мен скверлерге, 90-ы білім беру және денсаулық сақтау объектілеріне, 15-і діни объектілерге, 10-ы базарларға орнатылады»,- деді қала жетекшісі.