Израиль – Палестина қақтығысы: Қаза болған тілшілер саны 18-ге жетті

23.10.2023, 07:14 ktk.kz

Палестина тілшілері синдикатының мәлімдемесінде айтылғандай, Израиль соққыларының салдарынан палестиналық фотожурналист Рушди аль-Саррадж мерт болды.

Сондай-ақ онда 7 қазанда басталған израильдік шабуылдардан қаза тапқан БАҚ өкілдерінің саны 18-ге жеткені атап өтілген.

Р.Серрадждың жұбайы Шурук аль-Айле Анадолы агенттігінің тілшісіне мәлім еткендей, күйеуі Газадағы Тель аль-Хева кварталына соққы кезінде көз жұмды.

16 қазан күні Газадағы жарылыстардан 11 журналист қаза тапқаны туралы жазған едік.

Еске салайық, 7 қазанда Палестинадағы ХАМАС тобы Израильге шабуыл жасап, елдер соғыс жағдайына көшті.

Израиль – Палестина қақтығысы ушыға бастағаннан бері 4100 палестиналық және 1400 израильдік көз жұмды.

Қазір Газа секторы толық оқшаулау жағдайында тұр. Израиль мұнда жарық, тамақ және отынның жеткізілу жолдарын жауып тастады. БҰҰ дерегінше, Газада үш күнге жететін отын қалды.

Қазір әлем елдері Газаға гуманитарлық көмек жөнелте бастады.

Бізді Youtubе-та қараңыз!Бізді Facebook-та, Instagram-да, Telegram-да оқыңыз!