FT: Орталық банк жетекшісі Ресей экономикасына қатысты деректердің бір бөлігін жариялауды ұсынды

29.01.2023, 15:35 azattyq.org

Ресей орталық банк жетекшісі Эльвира Набиуллина нарықтың дамуына жол ашу үшін экономикаға қатысты деректердің бір бөлігін жариялауды ұсынды. Бұл жөнінде тәуелсіз үш дереккөзге сүйенген Financial Times басылымы жазды."Инвесторлар құнды қағаздарға инвестиция салу үшін ақпаратты қайтадан жариялай бастауымыз керек" деді Набиуллина. Оның сөзінен FT үзінді келтіреді.Басылым мәліметінше, Набиуллина экономика мәліметтерін құпия ету туралы шешімнің күшін жоюға атсалысып жүргендердің бірі. Мұндай шешім былтыр ақпанда Ресей Украинаға басып кіргеннен кейін қабылданған.Орталық банктің лауазымды қызметкерлерінің бірі статистикада ашықтықтың болмауы "тіпті жүйе ішіндегі адамдарға кедергі келтіріп отыр" деп айтқан.Ресей президентінің баспасөз хатшысы Дмитрий Песков деректерді құпия ету туралы шешімнің маңыздылығын "Ресейге қарсы жүргізіліп жатқан гибридтік соғыспен" түсіндірген. Дегенмен оның айтуынша, экономика саясатын әзірлеуге қатысатындардың барлығының қолында қажетті деректер бар. Песковтің сөзіне қарағанда, Владимир Путин Ресейдің экономикалық ахуалы туралы жоғары лауазымды тұлғалардан тұрақты түрде есептер қабылдайды."Путинге бұрмаланған ақпарат беріледі деген кез келген тұжырым қате. Оның қолында барлық ақпарат бар, әр апта сайын экономика кабинетінің отырысы өтеді" деді Песков Financial Times басылымына.Ресей Украинаға басып кіргеннен кейін үкімет экономикаға қатысты деректердің біраз бөлігін құпия еткен. Қазір сыртқы сауда статистикасы, банк жүйесінің мәліметтері, федералдық бюджеттің орындалуы, алтын валюта қоры, мұнай өндірісі мен экспорты, энергия тұтынуға қатысты деректер жарияланбайды.