Елордада электроника дүкенінен қымбат смарт-сағат ұрланды

13.09.2020, 10:44 inform.kz

НҰР-СҰЛТАН. ҚазАқпарат – Электроникалық дүкенге келген 26 жастағы жігіт витринадан қымбат смарт-сағатты ұрлап кетті, деп хабарлайды ҚазАқпарат тілшісі. «Белый ветер» электроника дүкеніне келген жас жігіт сатушының жоқтығын пайдаланып, витринадан құны 230 мың теңгелік «Apple watch» смарт-сағатын ұрлап кеткен. Осыдан кейін кедергісіз дүкеннен шығып, із суытып кеткен. «Полиция қызметкерлері 26 жастағы елорда тұрғынын ұстады», - деп хабарлайды қалалық полиция департаментінен. Қолсағат ұрлаған жас жігіт осылайша бірнеше сағаттың ішінде ұсталды. Кінәсін мойындаған айыпкер қымбат гаджетті дүкенге қайтарып берді. Қазіргі уақытта ол ҚР Қылмыстық кодексінің 188-бабы (ұрлық) бойынша айыпқа тартылған.