Қостанайда 21 жыл бұрынғы кісі өлімінің қылмысы ашылды

Қостанай полицейлері 21 жыл бойы ашылмай келген қылмыстың бетін ашып, 21 жастағы қызды өлтірген адамды анықтады. Қылмыс қалай болған? 2003 жылдың мамыр айында жеке тұрғын үйдің ауласынан зорлық-зомбылық белгілері бар 21 жастағы жергілікті тұрғынның мәйіті табылған. Сараптама оның тұншықтырылғанын анықтаған. Тергеу барысында күдікті болғанымен, сол кезде оны ұстауға жеткілікті дәлел табылмаған. Алайда полиция істі жауып тастамай, жыл сайын материалдарды қайта қарап, дәлелдерді талдауды жалғастырған. 21 жылдан кейін қылмыскер ұсталды 2024 жылдың ақпанында қосымша тергеу шараларының нәтижесінде полиция 44 жастағы ер адамды ұстады. Ол жауап алу кезінде кінәсін толық мойындаған. Күдіктінің айтуынша, ол марқұммен кездесіп, бірге ішімдік ішкен. Кейін жыныстық қатынасқа түсуді ұсынғанда, қыз бас тартқан. Ашуға булыққан ер адам оны тұншықтырып өлтірген. Қазіргі уақытта күдікті қамауға алынды, тергеу жұмыстары жалғасып жатыр.