Алматыда адам ағзасын сатып келген ер адам сотталды

28.02.2025, 06:47 kaz.365info.kz

Алматы қаласының мамандандырылған ауданаралық қылмыстық соты адам ағзаларын заңсыз сатып алу және сатумен айналысқан азаматқа үкім шығарды. 2023 жылдың күзіне қарай ұйымдасқан қылмысқа қарсы күрес қызметкерлері еліміздің бірнеше өңірінде жедел тергеу жұмыстарын жүргізіп, қара нарықта адам ағзасын сатумен айналысқан қылмыстық топ мүшелерін анықтады. Олардың қатарында тек делдалдар ғана емес, медицина қызметкерлері мен нотариустар да болған. Алайда ұсталған ондаған күдіктінің арасынан тек екі адам ғана сотқа тартылып, олар шартты жазаға кесілді. Ұзақбай гемодиализ кезінде бүйрек трансплантациясына мұқтаж науқастардың бірімен танысып, оған донор табуға көмектесетінін айтып, қызметі үшін 10 миллион теңге сұраған. Алғашында науқас отбасы мүшелерімен ақылдасатынын айтқанымен, Ұзақбай оған жиі хабарласып, сеніміне кірген. Науқастың жағдайы нашарлап, гемодиализ көмектеспей қалған кезде ол туыстарымен кеңесіп, трансплантацияға келісім берген. Ұзақбай оған бұл процестің ресми түрде және квота арқылы жүзеге асатынын айтып, кезексіз жасату үшін 10 миллион теңге төлеу қажеттігін алға тартқан. Осы уақытта Айман интернет арқылы Астанадан бүйрегін 8 миллион теңгеге сатуға келісетін донор тауып, оған Алматыдағы Сызғанов атындағы Ұлттық ғылыми хирургия орталығында ота жасалатынын уәде еткен. Донор мен науқас аталған орталықта медициналық тексеруден өтіп, кейін ота сәтті жасалған. Алайда операциядан кейін Ұзақбай науқастан донор үшін тағы 10 миллион теңге талап еткен. Осылайша, алғашқы клиент жалпы 20 миллион теңге төлеген. Бұл істің табысты екенін түсінген Ұзақбай тағы бір науқас пен донор тауып, сол орталықта ота жасатуды жоспарлаған кезде қолға түскен. Сот үкімімен Ислам Ұзақбай кінәлі деп танылып, 4 жылға шартты түрде бас бостандығынан айырылды. Сондай-ақ, бүйрегін сатпақ болған донор да заңсыз әрекеті үшін айыпталып, 2 жылға шартты жазаға кесілді.