"Әбден қиналып кеттік". Қобдадағы су тасқынынан кейін кейбір тұрғындар үйлеріне орала алмай отыр

azattyq.org

Әбден қиналып кеттік. Қобдадағы су тасқынынан кейін кейбір тұрғындар үйлеріне орала алмай отыр

Ақтөбе облысы Қобда ауылында тасқыннан зардап шеккен үш үй адам тұруға мүлдем жарамсыз. Қабырғасы құлаған төрт үйді арнайы комиссия «апатты жағдайда» деп бағалаған. Одан бөлек 17 үй әлі де суда тұр. Бұл туралы Ақтөбе облысының әкімдігі хабарлады.Ақтөбе облысының әкімдігі 18 наурыз күні таратқан ақпаратқа қарағанда, Қобдада 24 үй тұрғызылады. Әкімдіктің мәліметінше, арнайы комиссия әлі де шығын мөлшерін толық есептеп бітпеген.«Комиссия жұмысын аяқтағанша зардап шеккен әр отбасына 500 мың теңгеден ақшалай көмек көрсетіледі. Бұл - бюджет қаржысы емес» деп хабарлады әкімдік сенбі күні.Су тасқынынан зардап шеккендердің бірі, Қобда ауылының тұрғыны Марина Есімова құлағалы тұрған үйіне бес күннен бері арнайы комиссия мүшелері келмегенін айтады. Бес баланың шешесі 13 наурыздан бері су басқан үйіне кіре алмай жүр.- Қазір туысымның үйіндеміз. Шиеттей баламен кісінің үйіне сыю қиын екен. Әбден қиналып кеттік. Сенбі күні сағат 10:00-да Қобдаға Қазақстанның төтенше жағдайлар министрі Юрий Ильин келеді деп бәрімізді әкімдікке жинаған болатын. Алпыс шақты адам жиналды. Оның жартысы министрді күте-күте шаршап, тарап кетті. Отыз шақты жағдайымызды айтайық деп әлі отырмыз, - дейді Марина Есімова.Наурыздың 13-нен бері су тасқынына қарсы штабқа Қобда ауылының 101 тұрғыны хабарласып, үйін су алғанын айтқан. Әкімдіктің хабарлауынша, Қобдада су алған үй саны - 79.Қобда ауданы ғана емес, Ақтөбе облысының Ойыл ауданында да су тасып жатыр. Ойыл мен Қобдадан 13 наурыздан бері 400-ден астам тұрғын эвакуацияланған. Төрт мың бас мал қауіпсіз жерге айдалған.«Судың беті қайта бастады. Эвакуацияланған 140 адам тасқынның беті қайтқан соң үйлеріне оралды» дейді Ақтөбе әкімдігі. Дегенмен Ойыл ауданы Қаратал ауылының тұрғындары сенбі күні Азаттыққа әлі көмек жетпей отырғанына шағымданған еді.Осыдан бес күн бұрын, 13 наурызда Ақтөбе облысында Қобда ауылын су алған еді. 14 наурыз кешкісін Қобда ауылында төтенше жағдай жарияланды.Ақтөбе облысы төтенше жағдайлар департаментінің «ешбір елді мекенді су баспайды, жағдай тұрақты, бақылауда» деген мәлімдемесінен бірер сағат өткен соң, Қобдада тасқын басталған.Ақтөбе облысында күн күрт жылынып, қар еріп, өзендер тасыған соң, жолды су шайып, ондаған ауыл көлік қатынасынсыз қалды. Ойыл, Байғанин, Темір, Қобда, Шалқар аудандарында кейбір үйлерді су алған.Жергілікті халық жылда қайталанатын жағдайға алдын ала қамданбады деп билікке наразы.

  • Соңғы
Басқа жаңалықтар

Күнделікті жаңалықтар

Бүгін,
27 наурыз 2023