Батыс Қазақстан облысының бас мемлекеттік санитар дәрігері қызметінен кетті

01.11.2024, 10:13 ktk.kz

М.Арыспаев Facebook желісіндегі парақшасында қызметінің Астанада жалғасатынын хабарлады. Оның сөзіне қарағанда, 1989 жылы Қарағанды мемлекеттік медицина институтын ойдағыдай аяқтап келгеннен кейін еңбек жолын Батыс Қазақстан облысында бастаған.

«Жас маман ретінде Тасқала ауданындағы аудандық санитариялық-эпидемиологиялық станциясында алғашқы еңбек жолым басталып, кейін Жаңақала ауданында бас санитар дәрігер ретінде шыңдалдым. Жылдар салып Батыс Қазақстан облысының мемлекеттік санитариялық-эпидемиологиялық қадағалау басқармасының аса қауіпті аурулар бөлімінің дәрігер-эпидемиологынан департамент басшысына дейінгі барлық еңбек сатыларынан өттім.

Еңбек өтілімдегі 34 жылдың 20 жылын мемлекеттік қызметке, адал еңбек етуге арнадым. Осы жылдар ішінде ел үшін, медицина саласы үшін ең үлкен сынақ – 2020 жылы басталған Covid 19 еді. Халықты аман сақтау, вирустың көптеп таралуына жол бермеу жолында жанкештілікпен еңбек еткен әр маман, әр әріптесім – мен үшін батыр. Батыс Қазақстан өңірі маған әрқашан ыстық мекен. Бұл жерден жанашыр достар, тілеулес жандар, шын тілекші әріптестер таптым. Баршаңызбен бірлесе атқарған әріптестік үшін алғысымды жеткізгім келеді», - деп жазды М.Арыспаев.

БҚО санитариялық-эпидемиологиялық бақылау департаментінің ұжымы Мұхамғали Қайыржанұлының білікті де беделді басшы бола білгенін жеткізіп, жаңа қызметіне сәттілік тіледі.

Дереккөз: kazinform

Бізді Youtubе-та қараңыз!Бізді Facebook-та, Instagram-да, Telegram-да оқыңыз!