Қатар-2022: Камеруннан жеңілген Бразилия өз тобында бірінші орынға ие болды

03.12.2022, 02:03 inform.kz

Бұл топта 6 ұпаймен жекедара көш бастаған бразилиялықтар плей-офқа шығып қойған-ды. Сондықтан Тите Камерунмен ойынға бірқатар жаңа ойыншыларды шығарды. Ал Швейцарияның еншісінде 3, Камерун мен Сербияда 1 ұпайдан бар еді. Сондықтан камерундық ойыншылар да плей-офтан үмітін үзбеген болатын, оларға тек жеңіс керек-ті. Бірінші таймда командалар барынша шабуылдағанымен, есеп ашылған жоқ. Екінші кезеңде әуелі камерундықтар қақпаны нысанаға алса, содан кейін бразилиялықтар бірнеше мүмкіндікті мүлт жіберді. Ойын барысында Камерун қақпашысы Дэвис Эпасси өз командасын голдан құтқара білді. Керісінше 92-минутта камерундық Венсан Абубакар гол соғып кетті – 1:0. Жейдесін шешіп тастағандықтан, екінші ескерту алған Абубакар алаңнан қуылды. Сөйтіп Камеруннан жеңілгенімен, өз тобында бірінші орынға ие болған Бразилия 5 желтоқсан күні Оңтүстік Кореямен ¼ финалдың жолдамасын сарапқа салады. Бұл топта Швейцария екінші жолдаманы жеңіп алды. Ол 6 желтоқсанда Португалиямен кездеседі. Осылайша, әлем чемпионатында топтық бәсекелер аяқталды. Енді плей-офф матчтары басталады. Еске сала кетейік, бұдан бұрын Бельгиямен тең түскен Хорватияның жарысты жалғастыратынын жазған болатынбыз. Сондай-ақ Германия құрамасы плей-офф кезеңіне шыға алмай қалды. Португалия мен Оңтүстік Корея плей-офф кезеңіне жолдама алды.