Ресейдің футбол құрамасы Орталық Азия турнирінде ойнайды

14.03.2023, 06:37 azattyq.org

Ресейдің футбол құрамасы Орталық Азия ассоциациясының (CAFA) ерлер чемпионатында Ауғанстан, Иран, Қырғызстан, Өзбекстан, Тәжікстан, Түркіменстан командаларымен бірге ойнайды. Ресей Украинаға жаппай басып кіргелі бұл команда ресми турнирге алғаш қатысқалы отыр.Ресей командасының Орталық Азия турниріне қатысатыны туралы Тәжікстан футбол федерациясының баспасөз қызметі хабарлады дейді Азаттықтың Тәжік редакциясы. Тәжік футбол федерациясының баспасөз хатшысы Фаридун Салиевтің ресейлік "Матч ТВ" арнасына берген сұхбатында турнир қорытындылары ФИФА рейтингіне жазылатынын айтқан. Турнир шамамен маусым айында Ташкент пен Бішкекте өтуі мүмкін."CAFA үлкен футбол, мини-футбол және жағажай футболынан алты ел арасында шағын турнир өткізеді" дейді Sports.ru. Иран бастамасымен құрылған ұйымның президенті – Тәжікстан диктаторы Эмомали Рахмонның үлкен ұлы Рустам Эмомали.Ресейдің Украинаға басқыншылығынан кейін Еуропа құрама командалары Ресей командаларымен ойнаудан бас тартқан. Ресей командасы әлем чемпионатынан шеттетілген. Ресей құрамасы Босния және Герцеговинамен жолдастық кездесуін де өткізе алмаған. Қырғыз, өзбек және тәжік құрамаларымен үш ойын өткізген.Бұған дейін Ресей футбол одағы УЕФА-дан Азия футбол федерациясына ауысу мүмкіндігін қарастыратынын мәлімдеген. Түпкілікті шешімді 31 наурызда қабылдайды.Азия турниріне ауысатын болса, Ресей құрамасының халықаралық жарыстарға қатысуына жол ашылуы мүмкін. Алайда Ресей клубтары Еуропа кубогы мен Чемпиондар лигасының ойындарына қатыса алмайды.