Алматының спорт басқармасы WBO экс-чемпионының шағымына жауап берді

16.05.2024, 09:53 ktk.kz

Басқарманың баспасөз қызметі аталған жағдайға жауап берді, деп жазады kazinform. Спортшы өз парақшасында қалалық спорт басқармасының Алматыда турнир өткізуге рұқсат бермеуі кесірінен чемпиондық белбеуінен айырылып қалғанын жазды.

— Мен Әли Балоев — қазақстандық кәсіби боксшымын. 2023 жылы Қытайда WBO Global чемпиондық титулын жеңіп алдым және WBO рейтингінде 12 орында болдым. Бірақ бүгінгі күні белбеуді уақытылы қорғамауымның кесірінен одан айырылып қалдым. WBO Global чемпиондық титулын қорғау үшін Hardcore boxing ұйымының демеушілігімен Алматы қаласында бокс кеші ұйымдастырылып жатқан. Бірақ Алматы қаласы спорт басқармасының келісім бермеуінен турнир өтпей қалды. Ақпан айынан бастап бүгінгі күнге дейін олардан Almaty Arena-да болған оқиғаға сілтеме жасай отырып «жоқ» деген жауап алып келеміз, — деп жазды боксшы.

Спортшы шағымына жауап берген спорт басқармасы Hardcore Boxing ұйымдастырмақшы болған турнир спорттық іс-шаралар өткізу ережелеріне сәйкес келмегенін хабарлады. Сондай-ақ промоушн тиісті түзетулер енгізгеннен кейін 14 маусым күні кәсіпқой бокс кешін өткізуге рұқсат алғанын мәлімдеді.

— Алматы қаласының спорт басқармасы қазақстандық боксшы Әли Балоевтың өтінішін қарап, Hardcore Boxing промоушнының ұйымдастырушыларына шоу-бағдарламалар негізінде турнир өткізуге рұқсат бермегенін хабарлайды.

Аталған шараның форматы медиалық сипатта болғандықтан, бұл спорттық іс-шаралар өткізу ережелеріне сәйкес келмейді.

15 мамырда Алматы қаласының спорт басқармасының өкілдері мен ұйымдастырушылар арасында кездесу өтті. Түзетулер мен спорттық жарыстарды өткізу регламентіне сәйкес келгеннен кейін ғана 14 маусымда «Алматы Аренада» бас титулға таласатын кәсіпқой бокс кешін өткізуге рұқсат берілді, — деп хабарлады басқарма баспасөз қызметінен.

Бізді Youtubе-та қараңыз!Бізді Facebook-та, Instagram-да, Telegram-да оқыңыз!