Прокуратура ескертеді! Алаяқтардан сақ болыңыз!

03.12.2024, 08:29 kaz.365info.kz

Жетісу облысы прокуратурасының үйлестіруімен полиция интернационалдық алаяқтар тобының жолын кесті. 4 адамнан тұратын топ, шетелдік азаматтармен бірлесе отырып, біздің облыстың жүзден астам тұрғынын алдаған, олар 100 миллион теңгеден астам шығынға ұшыраған. Қылмыстық ниеттеріне қол жеткізу үшін олар әртүрлі алдау схемалары мен заманауи технологияларды, яғни қашықтан қол жеткізу қолданбаларын (AnyDesk, Kenguru, Teamviewer) және т.б. пайдаланды. «Топтың өзінің «Қолма-қол ақша шешу орталығы» бар, ол дропперлерді пайдаланып, қаражатты криптовалютаға аударып отырған. Олардың тұрғылықты жерін тінту кезінде 35 ұялы телефон, 3 жүйелік блок, 3 ноутбук, 2 пневматикалық тапанша және қымбат нөмірлері бар 3 люкс көлік тәркіленді. Топтың 4 мүшесіне қатысты сотқа дейінгі тергеп-тексеру жүргізілуде, қазіргі уақытта олар қамауға алынды», – делінген прокуратураның хабарламасында. Қылмыс жасағаны үшін күдіктілер мүлкін тәркілей отырып, жеті жылға дейін бас бостандығынан айыру түріндегі жазаға тартылуы мүмкін.