Дулат Исабеков Мұхтар Мағауиннің әруағынан кешірім сұрады

13.01.2025, 08:01 kaz.365info.kz

Дулат Исабеков бір кездері баспасөз бетінде өзімен айтысқан Мұхтар Мағауиннің ұлт алдындағы жақсылығын айтып, әруағынан кешірім сұрады. Бұл туралы жазушы Д.Исабеков «Хабар» телеарнасының «7 күн» сараптамалық бағдарламасына берген сұхбатында айтты. «Мұхтар Мағауиннің қазасын естігенде отырып қалдым. Ойпырым-ай, кеше ғана сау адам сияқты еді, екеуіміз айтысып жүр едік қой. Бұл қалай болғаны? Тіршілігіңде өлмейтіндей жүреді екенсің. Қайтыс болады деген ойымда жоқ еді. Кейде Мұхаңды «Әй, менен кейін қайтыс болатын шығар» деп ойлайтынмын», – деді жазушы-драматург. Сөз соңында Исабеков кезінде Мағауинмен өзімен баспасөз бетінде біраз айтысқанын еске түсіріп, кешірім сұрады. Әрі қазақ халқына үлкен әдеби, рухани олжа қалдырып кеткенін атап өтті. «Айналайын, Мұха! Артық айтып қойған болсам, әруағың кешірсін. Артық айтқан ешнәрсем жоқ сияқты деп ойлаймын. Егер де солардың бірін артық деп санасаң, кешірім сұраймын! Қазақ халқы үшін үлкен олжа қалдырып кеттің. Өзің кеттің, артыңда Мұхтар деген атың, шығармаларың мәңгілік қалды», – деді Дулат Исабеков.