Павлодарда ауыл тұрғындары жанып жатқан үйден қос қарияны құтқарды

12.03.2025, 11:49 ktk.kz

Ақсу қаласына қарасты Евгеньевка ауылында жер үй өртеніп, екі адам зардап шекті.

- 11 наурыз күні сағат 22.04-те Евгеньевка ауылының тұрғындары Сергей Дубинин мен Аркадий Серков жер үйдің шатырының өртеніп жатқанын байқайды. Уақытты жоғалтпай, олар шұғыл қызметтерге қоңырау шалып, көмекке асығады. Жанып жатқан үйге кіріп, егде жастағы үй иелерін, 1956 жылғы әйелді және 1955 жылы туған ер адамды алып шыққан, - деп хабарлады өңірлік төтенше жағдайлар департаментінен.

Ауылдың тағы бір тұрғыны Артем Стоцкий өз көлігімен зардап шеккендерді ауруханаға жеткізген. Қариялар өрт салдарынан қатты күйік алып, Ақсу қаласындағы ауруханаға жатқызылған. Бұған қоса өрт орнынан көлемі 50 литрлік екі газ баллоны шығарылған.

Оқиға орнында төтенше жағдайлар департаментінің күштері, жергілікті атқарушы органдардың қызметкерлері, сондай-ақ ерікті өртке қарсы құрылымдар жұмыс істеді. 100 шаршы метр алаңды шарпыған өрт толықтай 00.33-те сөндірілген.

Бізді Youtubе-та қараңыз!Бізді Facebook-та, Instagram-да, Telegram-да оқыңыз!