Батыс Қазақстанда үш ауылдың тұрғындары ауданға қатынаудан қалды

17.03.2025, 06:28 kaz.365info.kz

15 наурызда Батыс Қазақстан облысында Шідерті өзенінің тасуына байланысты уақытша көпір мен жолдарды су шайып кетті. Соның салдарынан үш ауылдың тұрғындары аудан орталығына қатынау мүмкіндігінен айырылды. Еріген қар суы Сырым ауданына қарасты Аралтөбе ауылы маңындағы Жымпиты-Ақсай тас жолында орналасқан уақытша көпірді бұзып өткен. Бұл өткел 2024 жылы негізгі көпір жөндеу жұмыстарына жабылған кезде салынған болатын. Алайда, тасқын су бетон плиталарды шайып кеткендіктен, көпірмен көлік қозғалысы толықтай тоқтатылды. «Көпір құлап жатыр, арғы жағын да жырып кетті. Көпірден өте алмай тұрмыз. Екіге бөліп тастаған», – дейді жағдайды түсірген бейнежазба авторы. Еріген қар суының көтерілуі 15 наурыздан бері жалғасып жатыр. Жыл сайын су тасқыны кезінде қара жолды су басатындықтан, Ақтайсай ауылының тұрғындары судың қайтуын және жолдың кебуін бір апта бойы күтуге мәжбүр.