Зерттеу: Шойгудың ұлы мобилизация басталмай тұрып бірнеше күн бұрын Ресейден кетіп қалған

09.06.2023, 07:38 azattyq.org

Алексей Навальныйдың командасы Ресей қорғаныс министрі Сергей Шойгудың некесіз туған ұлы, 22 жастағы Данила Шебунов туралы зерттеу жариялады. Онда министрдің ұлына Мәскеу орталығындағы екі кеңсені жалға беруден "миллион рубль" кіріс кіретіні жазылған.Зерттеу авторларының жазуынша, Шойгудың ұлы былтыр қыркүйекте Владимир Путин мобилизация жарияламай тұрып бірнеше күн бұрын Ресейден Түркияға кетіп қалған.Қазіргі кезде Шебунов "музыка саласында карьерасын жасап жүр" деп айтылады. Ол Sheba атты лақап атпен ағылшынша әндер жазып, клип түсіреді. Зерттеу авторларының мәліметінше, Шебуновтың видеосы "ондаған мың қаралым жинаған". Десе де, оның YouTube-арнасының 700-ден астам жазылушысы бар. Клиптері 250 мың рет қаралған.Бірқатар ақпарат құралдарының жазуынша, Данила Шебуновтың анасы төтенше жағдай министрлігінің ұшқыштар отрядының бұрынғы стюардессасы Елена Шебунова. 2019 жылы The Insider зерттеу жариялап, Шебуновтың анасы төтенше жағдай мен қорғаныс министрліктерінің келісімшарттарынан миллиард рубль табыс тапқанын жазған. Шойгудың одан үш баласы бар деп айтылады. Барлығы Рублевкадағы "Президент" элита мектебіне барған. Онда оқу бағасы жылына 2 млн рубль тұрады.Ресей қорғаныс министрінің некесіз туған ұлы бары жайлы ақпаратқа ресейлік сайттар да, Сергей Шойгудың өзі де түсініктеме бермеді. Қорғаныс министрі ресми түрде Ирина Шойгуға үйленген. Олардың екі қызы бар: төтенше жағдай министрлігіне қарасты жедел психологиялық көмек беру орталығының директоры Юлия және Ресей триатлон федерациясының жетекшісі Ксения.Бірнеше жыл бұрын Елена Шебунова Литва азаматы Адолфас Каминскасқа тұрмысқа шығып, оның тегіне өткен. 2022 жылы Литва билігі оны "ұлттық қауіпсіздікке қатер төндіруі мүмкін" деген себеппен ықтиярхаттан айырған.

Толық оқыңыз…