Xiaomi 70 мыңнан астам электр көлігіне тапсырыс алды

24.04.2024, 16:54 kz.kursiv.media

20 сәуірдегі жағдай бойынша қытайлық Xiaomi өзінің алғашқы электромобилі SU7-ге 70 мыңнан астам тапсырыс алды, деп хабарлады компанияның бас директоры Лей Цзюнь. Бұл туралы REUTERS агенттігі жазды.

Компания биыл 100 мың электромобиль жеткізуді көздеп отыр. Басылым бұл ретте бас директордың сөзін келтіреді.

«Xiaomi наурыз айының соңында электромобильге тапсырыс қабылдай бастады. Оның негізгі конфигурациядағы құны 215,9 мың юаньді (30,4 мың доллар) құрайды», – деп хабарлады басылым.

Бұл Tesla-ның Model S электр көлігі бағасынан шамамен 4 мың долларға төмен.

Citi сарапшыларының айтуынша, компания жыл сайынғы жеткізілімдері 300-400 мыңға жеткенде, көлік өндірісінде шығынсыз деңгейге жетеді.

Салыстырар болсақ, өткен жылы Tesla Қытайда 600 мыңнан астам көлік сатқан, Li Auto – 376 мың (бірақ компания негізінен электромобильдер емес, гибридтер шығарады), Nio – 160 мың дана.

Халықаралық энергетика агенттігінің дерегінше, 2024 жылы электромобильдердің жаһандық сатылымы 20%-ға дейін өсуі мүмкін.

2024 жылы автомобильдердің жалпы сатылымындағы электромобильдердің үлесі 20%-ды құрайды. Ал 2035 жылға қарай ол үштен екіге дейін артуы мүмкін.

Бұл ретте Қытайда биыл көрсеткіш 45%, Еуропада 25%, АҚШ-та 11%-ға жетуі мүмкін.