Британия барлауы: Ресейдің де, Украинаның да әскерилерінің "рухы түскен"

19.06.2022, 13:22 azattyq.org

Ұлыбритания қорғаныс министрлігі Украинадағы соғыс жайлы кезекті шағын хабарламасын жариялап, екі тараптың әскері қатарында "көңіл-күй мен әскери рух түскенін" айтады.Британия барлаушылары мұны Северодонецктегі ұзаққа созылған ауыр шайқаспен байланыстырады."Кейінгі апталарда украиналық әскерилер арасында дезертирлік жағдайлар болды. Ал Ресейде әскерилердің бүкіл бір бөлімшесі қақтығысқа қатысудан бас тартқан" дейді Британия тарабы.Бұған қоса, хабарламада Ресей әскерінде командирлер мен солдаттар арасында жанжал жиілеп, кейде қару қолдануға дейін баратыны да айтылған.Ұлыбритания барлаушылары ресейлік әскерилер арасындағы кикілжіңге басшылықтың сапасыздығы, бөлімшелерді ауыстырудың әлсіздігі, көп адам шығыны мен логистиканың нашарлығы себеп дейді."Көптеген әскерилерге Ресей билігінің мақсаты мен тапсырмасы да түсініксіз" дейді Британия қорғаныс министрлігі.Көктемде Киевті ала алмаған Ресей әскери күштерін Украинаның шығысына жіберіп, қазір Луганск пен Донецк облыстарын басып алуға көшкен. Екі тарап бірнеше аптадан бері Северодонецк қаласы үшін шайқасып жатыр.НАТО мен Киев Украиндағы соғыс "жылдарға созылуы мүмкін" деп ескертеді.