Лопес Алматыда да ән салады: жанкүйерлер наразылық білдіруде

22.05.2025, 08:42 kaz.365info.kz

Әлемге танымал әнші Дженнифер Лопестің Алматыда қосымша концерт өткізетіні туралы жаңалық қазақстандық тыңдармандар арасында дау туғызды. Бұл хабарлама 21 мамырда ұйымдастырушылардың әлеуметтік желідегі ресми парақшаларында жарияланған. Бұған дейін Лопестің жалғыз концерті 1 тамызда Астанада өтеді деп хабарланған. Сол себепті мыңдаған жанкүйер билет сатып алып, жол мен қонақүйге шығындалған. Енді Алматыдағы концерттің кенеттен қосылуы көпшілікке күтпеген соққы болды. Бұдан бөлек, Астанадағы концертке билет алу кезінде техникалық ақаулар орын алып, кей қолданушылар ақшасын төлесе де, билетті ала алмай қалған. Көптің ашуын туғызғаны — ұйымдастырушылар Алматыдағы концертті Астанадағы билеттер сатылып біткен соң ғана жариялауы. Кейбір жанкүйерлер шетелдік концерттерге билет сатып алуға мәжбүр болған.