Энергетика министрлігі электр қуаты тарифіне түсінік берді

27.02.2025, 10:41 ktk.kz

Бүгін Сенатта тілшілер министрлік өкілдерінен электр энергиясындағы тарифтің өзгеру мүмкіндігі туралы сұрақ қойды. Өз кезегінде С.Есімханов Энергетика министрлігі электр станцияларының электр энергиясын өндіруге арналған тарифтерін ғана бекітетінін еске салды.

- Оны жылына бір рет қараймыз және жыл сайын осы өзгерістер болып жатады. Биылғы 1 ақпаннан бастап станциялардағы тарифтер орташа есеппен 20 пайызға көтерілді. Жылына бір рет қарастырудың өзіндік себептері бар. Бұл ретте шикізатқа тарифтердің өсуі бар, яғни көмір қымбаттады, қосалқы бөлшектердің бағасы өсті, себебі инфляциялық процестер жүріп жатыр, - деді вице-министр.

Оның айтуынша, тарифтің өзгеруіне кадр мәселесі ықпал етті. Өйткені станциялардағы жалақы біртіндеп көтеріліп жатыр. Бүгінде станциялардағы өндірістік кадрлардың орташа жалақысы 400-420 мың теңгеге дейін өсті. Бұған қоса, аталған нысандарға жоғары сапалы жабдықтар сатып алынды.

- Жылу мен электр энергиясының бөлшек сауда нарығындағы тарифтерді Табиғи монополияларды реттеу комитеті (Ұлттық экономика министрлігі) бекітеді. Біз аталған ведомствомен бірге жұмыс істеп жатырмыз. Сондықтан ай сайын тарифтер көтеріледі деген міндет жоқ. Олардың да белгілі бір ережелері бар. Жоспарлы түрде тарифтер көтеріледі, сонымен қатар атаулы әлеуметтік көмек мәселелері де қарастырылады, - деді Сұңғат Есімханов.

Бізді Youtubе-та қараңыз!Бізді Facebook-та, Instagram-да, Telegram-да оқыңыз!