Қазақстанда пәтерін жалға берушілер табысынан 10% салық төлеуі тиіс

07.03.2025, 07:38 kaz.365info.kz

Қазақстанда пәтерін жалға беретін азаматтар өз табыстарынан салық төлеп, декларация тапсыруға міндетті. Жалдамалы баспана иелері жалға беруден түскен кірістері үшін 10% мөлшерінде салық төлеуі керек. Мысалы, егер азамат ай сайын пәтерін 200 мың теңгеге жалға берсе, оның жылдық табысы 2 400 000 теңгені құрайды. Осы сомадан 10% – яғни 240 мың теңге – мемлекетке салық ретінде төленуі қажет. Айта кету керек, 10%-дық мөлшерлемеге зейнетақы жарналары, әлеуметтік төлемдер және медициналық сақтандыру жарналары кірмейді. Бұл талап қоғамда әртүрлі пікір тудырып отыр: кейбірі оны дұрыс шешім деп санаса, енді бірі бұл жалға берілетін пәтер бағасының қымбаттауына алып келеді деп алаңдаулы.