Қазақстандық автосалондар ақауы бар жаңа көлікті ауыстыруға міндеттелуі мүмкін

19.03.2025, 05:58 kaz.365info.kz

Сауда және интеграция министрлігі автосалондарға қолайлы болып келген заңға өзгерістер енгізуді жоспарлап отыр. Егер бұл өзгерістер қабылданса, қазақстандықтар жаңадан сатып алған көліктерінде ақау анықталған жағдайда, оны қайтарып немесе ауыстыру мүмкіндігіне ие болады. Соңғы уақытта жаңа көлік алғанымен, көп ұзамай ақауға тап болған азаматтардың саны көбейіп келеді. Мәселен, 2023 жылы сапасыз көлікке шағымданған 144 адамның 57-сі Қытайда шығарылған көлікті сатып алған. Кейбір автомобильдер мүлде жүрмей қалса, басқалары уәде етілген сапаға сәйкес келмеген. Нәтижесінде, 58 тұтынушыға жалпы сомасы 810 миллион теңге қайтарылған. Министрлік өкілдерінің айтуынша, жаңа өзгерістер күшіне енсе, тұтынушыларға әлдеқайда тиімді жағдай жасалады. «2021 жылғы желтоқсандағы өзгерістерге сәйкес, автокөліктегі қандай да бір ақау болса, оны тек жөндеуге болады. Ал болашақта ұсынылып отырған жаңа заң жобасы қабылданса, көлікті қайтару немесе айырбастау мүмкіндігі де беріледі», – дейді Сауда және интеграция министрлігі Тұтынушылардың құқықтарын қорғау комитеті төрағасының орынбасары Серік Құсайынов. Егер бұл түзетулер қолданысқа енсе, тұтынушылар сапасыз немесе ақаулы көліктерін еш қиындықсыз қайтарып, ауыстыруға мүмкіндік алады.