Ипотекалық бағдарлама көп, тиімдісі қайсы

16.04.2025, 09:46 zhambylnews.kz

Пәтердің толық құнын қалта көтермеген жағдайда көпшілік түрлі ипотекалық бағдарламаны пайдаланады. Осы орайда, тұрғын үй нарығы бойынша сарапшы маман Ақерке Бодаубекқызы бағдарламаның бәрімен толық таныспай, шешім қабылдамау керектігін айтады. – Барлық ипотекалық бағдарлама туралы біліп жүру керек. Себебі көптеген адам қандайда бір бағдарлама басталғанда эмоцияға беріліп жатады. Егер тым атышулы, танымал бағдарлама бойынша көпшілікпен бірге үй алар болсаңыздар, қымбатшылыққа ұрынып қалуларыңыз мүмкін. Әрбір азамат алдын ала барлық ипотекалық бағдарламаны қарап, салыстырып, сараптап, содан кейін барып таңдаса, анағұрлым жеңіл болары анық, – деді ол Jibek Joly арнасының «Бүгін LIVE» бағдарламасында. Сарапшы нарықтағы тиімді ипотекалық бағдарламаларды да атап өтті. – Бүгінгі таңда 7-20-25-тің ай сайынғы төлемдері ғана қолжетімді болып тұр. Бірақ мерзімі ұзақтау. 25 жылға аласыз. Десе де, қазір жалдамалы пәтерде тұрып жатқан қаншама отбасы бар. Әрине, ол кісілерге біреудің пәтеріне 140-150 мың төлегенше, осы ақшаны өз пәтеріне құйғаны артық. Бұл мен айтқандай оңай болмайды. Өйткені ол жерде алғашқы жарна бар. Одан бөлек құрылыс мәселесі тағы бар. Құрылыс жұмыстарына көп азамат 3-4 млн тг кететінін айтады. Бұл ақшаға жасалған құрылыс жұмыстары сіздің көңіліңізден шыға ма деген мәселе бар. Бұл — ешқандай техниканы қоспағандағы сома. Бұдан басқа, үй кезегінде тұратын азаматтарға арналған 2-10-20, 5-10-20 бағдарламаларының ай сайынғы төлемі аз шығады, – дейді Ақерке Бодаубекқызы. Ипотекалық бағдарламаларды зерттеп жүрген маман кейінгі жылдары пәтер бағасының едәуір көтерілгенін айтады. – Бір жыл бұрын құрылысы толық аяқталған үйлерді 30-33 млн теңгеге табуға болатын еді. Тіпті бұл ақшаға дизайнерлік жөндеу жасалған 2 бөлмелі пәтер алуға болатын. Ал қазір мұндай жаңа үйлер 40-45 млн теңгеге дейін барады. Пәтерлерге сұраныс бар болса, баға да өсе береді. Ал сұраныстың артуына нәпақа табу мақсатында сырт жақтан келіп жатқан азаматтардың көп болуы себеп. Мұндай қарқынмен пәтер бағасының төмендеуі екіталай. Баға тек апатты, төтенше жағдайларда ғана төмендейді, – дейді сарапшы. Сарапшы өзінің пәтер алудағы лайфхактарымен де бөлісті. – Мен өзім «Отбасы банктің» 50/50 бағдарламасымен пәтер алдым. Себебі менде 50 пайыз жарна құятын жиналған ақшам болды. Ақшаны жинау үшін артық шығынды тыю керек. Қонақты көп күтуден бас тартқан жөн. Ақшаны керек емес заттар мен азық-түлікке жұмсамай қоя тұру қажет. Айына 1000 теңге болса да, 10 000 теңге болса да жинап отыру керек. Тиын теңгеден құралады. Осыны жақсы түсінсе, адамдар ол ақшаны керек емес затқа жұмсағанша, жинауға кіріседі, – дейді ол.