Қазақстанның оңтүстігінде көктемгі егіс жұмыстары аяқталуға жақын

07.05.2025, 11:07 kaz.365info.kz

Елімізде көктемгі егіс науқаны қызу жүріп жатыр. Қазіргі таңда республика бойынша шамамен 2,1 миллион гектар жерге ауыл шаруашылығы дақылдары егілді. Агротехникалық мерзімдерге сай жүргізіліп жатқан егіс жұмыстары әсіресе оңтүстік өңірлерде белсенді жүргізілуде. Мәселен, Түркістан облысында – 449,2 мың гектар, Жамбылда – 306 мың гектар, Жетісуда – 292,6 мың гектар, Алматы облысында – 187,9 мың гектар жерге егін егілді. Сонымен қатар, Шығыс Қазақстан (156,3 мың га), Абай (138,8 мың га), Қостанай (85 мың га), Ақмола (74,8 мың га), Қызылорда (52,5 мың га), Павлодар (56,9 мың га) облыстары мен өзге аймақтарда да егіс науқаны жалғасуда. Бүгінгі күні егілген дақылдардың көлемі келесідей: • дәнді дақылдар – 942,1 мың га, • мал азығы – 242,8 мың га, • майлы дақылдар – 492 мың га, • мақта – 118,8 мың га, • көкөніс – 71,8 мың га, • бақша өнімдері – 57,7 мың га, • картоп – 32,5 мың га, • қант қызылшасы – 15,6 мың га, • күріш – 26,3 мың га. Егіс жұмыстарының тиімді әрі уақытылы жүргізілуі үшін 866,8 мың тонна минералды тыңайтқыш жеткізуге келісімшарттар жасалған. Сондай-ақ, арзандатылған бағамен (254 теңге/литр – нарық бағасынан 15% төмен) 401 мың тонна дизель отыны бөлінді. Ауыл шаруашылығы дақылдарының тұқымға қажеттілігі толық қамтылған – биыл 2,3 млн тонна тұқым дайындалып, оның 99%-ы кондициялық деп танылды. Ауыл шаруашылығы министрлігі егіс жұмыстарының барысына бақылау жүргізіп, өңірлерге әдістемелік және ұйымдастырушылық қолдау көрсетуді жалғастыруда.13:44