Алматыны гүлмен көмкеруге 2,6 млн теңге бөлінді

13.05.2025, 10:43 zhambylnews.kz

Биыл Алматыда 219639 шаршы метрден астам аумақты көгалдандыру жоспарда бар. Оның 64%-ын көпжылдық өсімдіктер алады — бұл алдыңғы маусымдарға қарағанда бір жарым есе көп. Бұл туралы Экология және қоршаған орта басқармасының Kazinform сауалына жолдаған жауабында айтылған. Басқармадан мәлім еткендей, 2025 жылы Алматы қаласының аумағында декоративті-гүлді көгалдандыру алаңы 219 639 шаршы метр. Оның ішінде 77 386 шаршы метр (36%) — біржылдық өсімдіктер, 142 мың шаршы метр (64%) — көпжылдық. — Бұдан бөлек, 2024 жылдың күзінде шамамен 15 мың шаршы метр пиязшықты гүлдер отырғызылды. Қазір олар гүлдеу фазасында. Ауа райы қолайлы болған жағдайда, қызғалдақтар мамыр айының ортасына дейін қала тұрғындары мен қонақтарының көз қуанышы болмақ, — деп атап өтті әкімдіктен. Мамандардың айтуынша, қалалық көгалдандыруға арналған өсімдіктерді таңдау бірнеше негізгі факторға негізделуі тиіс. Біріншіден — қолайсыз жағдайларға төзімділік. Қалалық гүлдер жоғары шаңдылыққа, ылғалдың жетіспеушілігіне және температура ауытқуларына төтеп бере алуы керек. Сондай-ақ, қаладағы гүлзарларға келесі талаптар қойылады: механикалық зақымдарға төзімділік, көлік газдарына шыдамдылық, күтімнің қарапайымдылығы, ұзақ гүлдеу кезеңі. Көгалдандыру жұмыстары кезең-кезеңімен жүргізіледі: Раушан, эхинацея, лилейник, лаванда, шалфей, мискантус және гортензия сияқты көпжылдық өсімдіктер қалалық жағдайларға өте төзімді, күтімі аз және ұзақ гүлденуді қамтамасыз етеді, бұл отырғызу материалын жыл сайын ауыстыру қажеттілігін азайтады. Оларды отырғызу 15 сәуірден 15 мамырға дейін жүзеге асырылады. — Бегония, петуния, герань, тагетис, сальвия және тағы басқалары — 1 мамыр мен 10 маусым аралығында отырғызылады. Коламбус, Абба, Династи, Стронг Голд, Лалибелла, Ляп Топ — 10 қазан мен 10 қараша аралығында егіледі. Осылайша, қалалық гүлзарларда сәуірден қазанға дейін гүлдеу қамтамасыз етіледі, — делінген жауапта. Қаланың декоративті-гүлді көгалдандыруы бес жылда бір рет жаңартылып отырады, бұл жалпы сәулет-көркем келбетті сақтауға және экология мен эстетика саласындағы заманауи талаптарды ескеруге мүмкіндік береді. Гүл түрлері бекітілген жобалық шешімге сәйкес іріктеледі. Бұл ретте, біржылдық өсімдіктерді қолдану гүлзар дизайнын жыл сайын өзгертуге жағдай жасайды.Қаланы абаттандыру тұжырымдамасы аясында негізінен симметрияны, геометриялық пішіндерді және айқын композициялық құрылымды сақтай отырып, көркемдеудің тұрақты стилі қолданылады. Гүл композицияларының ең танымал түрлері — сфералық және фигуралық элементтер: шарлар, алмалар, қаланың елтаңбасы, тақырыптық паннолар, сондай-ақ каскадты және толқынды отырғызулар. Заманауи технологиялар қалалық гүлзарларды жасауда жаңа мүмкіндіктер ашады. — Тігінен көгалдандыру — шектеулі кеңістік үшін барған сайын танымал шешім. Модульдік жүйелер гүл композицияларын жол айрықтарының қоршауларында, көше жарықтандыру тіректерінде жасауға мүмкіндік береді. 2025 жылы тігінен көгалдандырудың 6 мыңнан астам элементін орнату жоспарланған. Гүлзарлар мен гүл алаңдарының эскиздері мердігер ұйымдар тарапынан әзірленіп, тапсырыс берушімен міндетті түрде келісіліп бекітіледі, — деп жауап берді басқармадан. Маусымдық көгалдандыру жұмыстарына 300-ден астам адам жұмылдырылады. Олардың ішінде агрономдар, ландшафт сәулетшілері, гүл өсірушілер, көгалдандыру мамандары бар. Сонымен қатар, 70-тен астам арнайы техника тартылады. Көгалдандыру кампаниясы жыл сайын наурыз айында гүлзар топырағын дайындаудан басталып, қараша айында пиязшықты гүлдерді отырғызып, көпжылдық өсімдіктерді қысқа дайындаумен аяқталады. Қалалық аумақтарды көгалдандыру бағдарламалары қаланың барлық ауданын қамтиды. Бұдан басқа, жеке лотқа жол бойына, магистральдық көшелерді, бөлу жолақтарына көгалдандыру жұмыстарын жүргізу бөлінген. Әр аудан бойынша көгалдандыру жұмыстарына біржылдық гүл көшеттерінен гүлзарлар жасау, раушан бақтарын және көпжылдық өсімдіктерден гүлзарлар орнату, сәндік гүлдейтін бұталарды отырғызу, қызғалдақтарды отырғызу, сондай-ақ сәуірден қарашаға дейін күтім жасау жұмыстары кіреді. — 2025 жылы Алматы қаласын декоративті көгалдандыру бойынша ауқымды шараларды іске асыруға жергілікті бюджет есебінен 2 600 млн теңге көлемінде қаржы қарастырылған. Аталған жобалар мегаполистің экологиялық жағдайын жақсартуға ғана емес, сонымен қатар қолайлы әрі эстетикалық тартымды қалалық ортаны қалыптастыруға бағытталған, — деп хабарлады Экология және қоршаған орта басқармасынан. Осыған дейін, биыл Алматыға 320 мың ағаш отырғызылатыны туралы жазған едік.