«Алматы – бақша қаласы": танымал алматылықтар бастаманы қолдап, алма ағаштарын отырғызды

27.04.2024, 14:37 almaty-akshamy.kz

«Таза Қазақстан» республикалық экологиялық акциясы аясында Алматыда «Алматы – бақша қаласы» акциясы аясында жаппай алма ағаштарын отырғызу жүріп жатыр. Шараға қала тұрғындарымен бірге мегаполис әкімі Ерболат Досаев қатысты.

Ағаш отырғызу үшін Алматының барлық аудандарында арнайы орындар белгіленді. Шаһар басшысы мен қала тұрғындары БАК бойындағы саябаққа 500 алма ағашы мен 500 өрік отырғызды.

«Бүгін біз «Алматы – біздің ортақ үйіміз» атты тамаша акциямызды жалғастырып жатырмыз. Соның аясында біз ағаш отырғызып жатырмыз. Шараға қалаға бей-жай қарай алмайтын тұрғындар қатысып жатыр. Біз де депутаттық корпус ретінде келдік. Бүгінгі күннің ерекшелігі сол, біз жеміс ағаштарын отырғызудамыз. Біраз уақыттан кейін біздің қала өзінің апортымен, жеміс-жидектерімен танымал болып, өзінің даңқын қайтарады», — деді Алматы мәслихатының депутаты Әсия Ақанова.

Акцияға Қорғаныс министрлігінің спортшылары, эстрада жұлдыздары, түрлі спорт түрлерінің чемпиондары, белгілі қоғам қайраткерлері атсалысты.

«Біз ЦСКА спортшыларымыз. Алматы-біздің ортақ үйіміз. Алматының тазалығы-біздің денсаулығымыздың кепілі",-дейді Қорғаныс министрлігі Спорт комитетінің оқу-жаттығу орталығының бастығы-ЦСКА (Алматы филиалы) майор Берден Ақпанбеков.