Пингвиндер жойылып кетуі мүмкін

28.08.2023, 14:22 almaty-akshamy.kz

Олардың алаңдауы бекер емес. Өйткені соңғы зерттеу нәтижелері көрсетіп отырғандай, былтыр 10 мыңдай балпанақ қырылып қалған, деп хабарлайды Almaty-akshamy.kz 24.kz-ке сілтеме жасап.

Ғалымдар Антарктикадағы Беллинсгаузен теңізіндегі императорлық пингвиндерді бақылаған. Бұл теңіз құстарының ішіндегі ең ірілері. Былтыр солардың 10 мың балапаны қырылып қалған. Өйткені олардың тіршілік етуі үшін қажетті мұз тез жұқарып барады. Сөйтіп қанаты әлі қатпаған балапандар суға құлап, өз бетінше жүзе алмай, өліп қалады екен.

Норман Рэтклифф, британдық антарктикалық қызметінің өкілі: - Біз императорлық пингвиндердің 5 тіршілік ету аймағын бақыладық. Мұндай жағдай солардың төртеуінде тіркелген. Былтыр тек бір аймақта ғана балапандар тірі қалған.

Бұған климаттың өзгеруі себеп дейді мамандар. Рекордтық температура салдарынан мұз қатып үлгермейді. Әдетте минус 50 градус болатын кезде былтыр Антарктидада минус 10 градус болған.

Норман Рэтклифф, британдық антарктикалық қызметінің өкілі: - Бүкіл Антарктида бойынша 2,7 миллион шаршы шақырым мұз еріп кеткен. Бұл Ұлыбритания аумағынан 10 есе көп. Кейінгі 45 жылда мұндай жағдай алғаш рет тіркеліп отыр.

Антарктидада императорлық пингвиндердің 62 мекен ету аймағы белгілі. 2018-2022 жылдар аралығында солардың 30 процентіне мұздықтардың еруі әсер еткен. Жағдай осылай жалғаса берсе, осы ғасырдың соңына таман императорлық пингвиндердің 90 пайызы жер бетінен жойылып кетеді дейді ғалымдар. Олар мұндай жағдайды болдырмау үшін ең бастысы атмосфераға бөлінетін зиянды газдардың мөлшерін күрт азайту керек екенін тағы да айтады.