Мәжіліс депутаттары: "Хит-әндер қыз алып қашуды ашық насихаттайды"

05.12.2024, 09:16 ktk.kz

«Қазіргі хит-әндер қыз алып қашуды ашық насихаттайды». Осылай деген Мәжіліс депутаттары бүгінгі қазақ эстрадасындағы әндердің мазмұнына терең бойлап, бәрін бір сүзгіден өткізетін кез келді деп санайды.

Мұрат Әбенов, Мәжіліс депутаты: — Белгілі әншілер, осылай қазір ән айтып жүр. Сахнадан, теледидардан көрсетеді. «Алып қашамын, мейлі қаламан, келін қыламын, сені қалаймын, анама». Екінші әнші «Көресің менің үйіме барасың, басыңа ақ орамал тағасың, көндіремін, көнесің, қыз болып келесің, келін болып қаласың». Міне, бұл мәжбүрлеу. Соны біз насихаттап, көрсетіп жатырмыз. Депутаттардың бұлай даурығуына соңғы кезде қыз алып қашу дерегінің күрт жиілегені себеп. Бір Түркістан облысында жыл басынан бері 18 қызды күштеп, еркінен тыс алып қашқан. Қыздың ата-анасының алдынан өтіп, рұқсатын алмай, бірден ескірген салт-дәстүрге жүгінетіндерге тек ескерту беріп жібере салу ақылға сыймайтын әрекет деп отыр депутаттар. Себебі оңтүстік өңірде жәбір көрген қыздар қанша жерден арыз жазып, сотқа жүгінсе де, іс тергелмей жатып-ақ жылы жабылады. Оған себеп көп. Бастысы — тараптардың татуласуы. Бірнеше депутаттың пікірін тыңдаған спикер Ерлан Қошанов алдағы уақытта Мәжіліс қыз алып қашқандарды заң жүзінде жазалайтын норманы назарға алатынын айтты.