Балқаш қаласында 750 млрд теңгеге мыс қорыту зауыты салынады
Балқаш қаласында мыс қорыту зауыты салынады. Жеке инвестициялардың жалпы көлемі 750 млрд теңгені құрайды.
Үкімет өнеркәсіп және құрылыс министрлігі мен «Qazaq Smelter» ЖШС арасындағы мыс қорыту зауытын салу жобасы бойынша инвестициялар туралы келісімді мақұлдады. Тиісті қаулыға Олжас Бектенов қол қойды.
Кәсіпорынның құрылысы 2027 жылы басталып, 2030 жылы пайдалануға беру жоспарланған. Зауыттың өндірістік қуаты жылына 300 мың тонна катодты мыс, 10 тонна алтын, 300 тонна күміс және 1,5 млн тоннадан астам күкірт қышқылын өндіруге қауқарлы.
Жоба 1200-ге жуық тұрақты жұмыс орнын ашуды көздейді. Кәсіпорын іске қосылған кезде қызметкерлердің 90%-ы басшылық лауазымдарды қоса алғанда, қазақстандық мамандарды құрайтын болады, алдағы бес жыл ішінде олардың үлесі 95%-ға дейін артады. Сондай-ақ инвестор Қарағанды облысының оқу орындарында 50 студентті даярлау бойынша міндеттемелер алады.
Жаңа қуаттарды іске қосу ел ішінде мыс шикізатын қайта өңдеу көлемін 1,5 есеге арттырып, жылына 800 мың тоннадан астам көлемге ұлғайтуға мүмкіндік береді.
Өңдеу өнеркәсібінің көлемі артты
2026 жылдың алты айының қорытындысы бойынша өңдеу өнеркәсібіндегі өндіріс көлемі 9,8%-ға ұлғайды. Өсім машина жасау, тамақ және химия өнеркәсібі, мұнай өңдеу, құрылыс материалдарын шығаруда және басқа да салаларда байқалады. Осы кезеңде елімізде 232 мың тонна катодты мыс өндірілді.
Катодты мыс – қосылған құны жоғары өнім шығарудың негізгі шикізаты. Ол электр кабельдері мен жабдықтарын, құбырларды, құрылыс материалдарын, автомобиль бөлшектерін, сондай-ақ қола, жез және басқа да мыс қорытпаларын өндіруде қолданылады.
Еске сала кетейік, Түркістан облысы Сауран ауданында биологиялық белсенді қоспалар өндіретін зауыт құрылысы басталды. 20,4 млрд теңгенің жобасын Orzax түрік компаниясы жүзеге асырады.
- Соңғы
Күнделікті жаңалықтар
30 шілде 2026
