Өзбекстанда коронавирус жұқтырғандар көбейіп жатыр

25.11.2022, 04:26 azattyq.org

Соңғы бір аптадан бері Өзбекстанда коронавирус жұқтырғандар қайтадан көбейе бастады. Бұл туралы Өзбекстан денсаулық сақтау министрлігі хабарлады.Мекеме мәліметіне қарағанда, 24 қарашада 98 адамның COVID-19 жұқтырғаны анықталған.Соңғы бір аптада 482 адам ауруханаға жатқызылса, 358 науқас жазылып шыққан. Бұдан бөлек 2 310 адам карантинге алынып, 1 306 адам карантиннан шығарылған. Бұл жөнінде Өзбекстан санитария-эпидемиология жағдайын жақсарту және қоғамдық денсаулық қызметі жетекшісінің орынбасары Нурмат Отабеков хабарлады."Соңғы 14 күнде Өзбекстанда вирустың жайылу көрсеткіші 2,0-ді құраған (ДДСҰ көрсеткіші бойынша 1,0 болса, ахуал тұрақты деп есептелінеді). Қазір коронавирусты емдейтін стационарларда 539 пациен жатыр, 187 адам үйде емделіп жатыр" деді Нурмат Отабеков.Коронавирус індеті басталғалы бері елде 245 665 адамға коронавирус жұққан, 243 234-і айыққан. 1 637 адам қайтыс болған.