Астанада адам папилломавирусына қарсы вакцинация жүріп жатыр

24.09.2024, 10:15 kaz.365info.kz

Елордада адам папилломавирусына (АПВ) қарсы вакцинация науқаны басталды. Бұл шара қыздардың денсаулығын қатерлі ісіктің ең қауіпті түрлерінің бірінен қорғауға бағытталған. Қазіргі уақытта қалада вакцинаның 12 мыңнан астам дозасы бар. Жоспарлы тәртіппен вакцинациялауға қала бойынша барлығы 13 мыңға жуық 11 жастағы қыздар жатады. Сондай-ақ 12-13 жас аралығындағы қыздарға толықтыра иммундау қарастырылған. «Мен вакцина туралы медбикеден алған буклеттен оқыдым. Содан кейін анамнан сұрадым, ол келісті. Бүгін вакцина алдым, ауырған жоқ, қорықпадым. Қазір өзімді жақсы сезінемін», – деді №75 мектеп-гимназиясының 8-сынып оқушысы Адель Уагизова. АПВ вакцинасы өзінің тиімділігі мен қауіпсіздігін халықаралық деңгейде дәлелдеді. Бүгінгі таңда бұл вакцина әлемнің 135 елінде қолданылады, соның арқасында бірқатар елде әйелдер арасында АПВ таралуы бүгінгі күні 90%-ға төмендеді. «11 жастан бастап қыздарға АПВ-ға қарсы вакцинациялауды бастау – біздің өскелең ұрпақтың болашақ денсаулығын қорғаудағы маңызды қадам. Біздің мақсатымыз – барынша қорғанысты қамтамасыз ету және халық арасында сырқаттанушылықты азайту. Біз ата-аналарды балаларын қауіпті аурулардан сақтау үшін осы мүмкіндікті пайдалануға шақырамыз», – деді елордалық Қоғамдық денсаулық сақтау басқармасының басшысы Әлия Рүстемова.