Алматыда қолқасы шарбыланған науқасқа бір кезеңде бірегей гибридті ота жасалды

19.03.2025, 11:48 kaz.365info.kz

Алматы қалалық кардиоорталығында төмендеме қолқа шарбылануын емдеуге арналған күрделі әрі сирек кездесетін гибридті ота сәтті өткізілді. Бұрын мұндай жағдайларда емдеу екі кезеңнен тұратын: алдымен тамырлы хирургиялық араласу жасалып, содан кейін стент-графт имплантациясы жүргізілетін. Алайда заманауи технологиялардың дамуы және Алматы Кардиоорталығы дәрігерлерінің жоғары біліктілігінің арқасында бұл күрделі ота бір ғана кезеңде жүзеге асырылып, асқыну қаупі барынша азайтылды. Қабылдау бөлімінде жүргізілген тексерулер нәтижесінде төмендеме қолқаның жіті шарбылануы диагнозы қойылды. Бұл жағдай аса қауіпті болып саналады, өйткені қолқаның жарылу, шарбыланудың висцералды артерияларға таралу (бүйрек пен ішекке әсер ету) және органдардың ишемиясына әкелу қаупі жоғары болды. Науқастың өміріне төнген қауіп пен жағдайдың күрделілігін ескере отырып, кардиохирургтар мен эндоваскулярлық мамандар бірлесіп, гибридті ота жасау туралы шешім қабылдады. Бұл тәсіл операция уақытын қысқартып, хирургиялық тәуекелдерді азайтуға және пациенттің тезірек қалпына келуіне мүмкіндік берді. Операцияға қан тамырлары хирургтары, интервентологтар, кардиохирургтер, анестезиологтар және реаниматологтар қатысты. Ота 5 сағаттан астам уақытқа созылып, таңғы 4-те сәтті аяқталды. Алматы Кардиоорталығы мамандарының жоғары кәсібилігі мен медициналық мекеменің заманауи жабдықталуының арқасында науқас отадан кейінгі төртінші күні қалпына келіп, үйіне шығаруға дайындалуда. Алматы Кардиоорталығы – еліміздегі ең озық медициналық технологияларды қолданатын жетекші мекемелердің бірі.