«Біздің жаққа екі рет оқ атылды»: Шерзат Полат ісі бойынша екінші куәгер сотта сөз сөйледі

28.04.2025, 18:05 kaz.365info.kz

Жетісу облысының қылмыстық істер жөніндегі мамандандырылған ауданаралық сотында Шерзат Полатты өлтіру ісі бойынша сот процесі жалғасуда. Бүгін оқиға орнында болған куәгер Дана Жақсыгелді өз айғақтарын бере бастады. Дана Жақсыгелдінің айтуынша, олар Эльмира Нұрбековамен бірге «Қамажай» дүкенінен темекі сұраған. «Бірақ бізге сатпайтынын айтты. Содан мен бірінші болып сыртқа шықтым. Артымнан Эльмира шықты. Біз сыртқа шықтық. Сол кезде төбелес басталып кеткен еді. Мен көліктің арт жағына қарай шегіндім. Сол кезде атыс басталды. Бізге қарай сақал қойған, бойы ұзын, сұр киімді жігіт оқ атты. Мылтықпен, мылтықпен атты. Алдымен әуеге атты. Сосын екі рет біздің жаққа оқ атты. Осыдан кейін төбелес көшенің басқа жағына ауысты. Сол жерде төбелес жалғасты», — деді куәгер. «Бізге мылтықтан оқ атылған соң, төбелес мүлде көшенің арғы бетіне ауысты. Дүкеннің артындағы көшеге, үйлердің арасына. Ал мен сол кезде көліктің жанында тұрған едім. Көлікке отырдым да, сонда қалдым. Бес минуттай отырып, қайта шықтым. Екі-үш метр жүріп барып: “Жігіттер, қайтайық!” деп айғайладым. Бірақ ешкім мені естімеді. Содан көлікке қайтып келіп, қайта отырдым. Күттім», — деді Дана Жақсыгелді. Дананың айтуынша, мылтық атылған соң ол өз өмірі үшін қатты қорыққан. Прокурор оған «Неліктен 102-ге немесе жедел жәрдемге хабарласпадыңыз?» деген сұрақ қойған кезде, куәгер былай жауап берді: «Ондай ой басыма келген жоқ. Бір жағынан, өмірімде алғаш рет мылтық көрдім. Алғаш рет оқтың атылғанын естідім. Сондықтан қорқып, көліктен шықпай отырдым. Өмірім үшін қорықтым».